Samsung бутунлай қайрилма 3D-экранли смартфон патентлади – бу Galaxy S12 бўлиши мумкин! (+расмлар)
Жанубий кореялик корпорация дисплейи ҳар тўрт томонидан қайрилган, умуман ромсиз смартфон тайёрлаётгани ҳақида ўтган йилнинг декабридаёқ миш-мишлар чиққанди. Letsgodigital нашри бугун унинг патент ҳужжатларидаги чизмалар ҳамда рендер суратларини эълон қилди.
ЎҚИНГ: Samsung умуман кемтик ва тирқишларсиз, ромсиз экранли идеал смартфон тайёрлаяпти!
Samsung Electronics ҳали ўшанда – ўтган йилнинг охиридаёқ Бутунжаҳон интеллектуал мулк ташкилотига мазкур қурилмани патентлаштириш учун ҳужжат топширган экан. Орадан деярли олти ой ўтибгина бу ҳужжатларнинг айрим қисмлари эълон қилинди.
Патент ҳужжатидаги чизмаларга кўра, смартфоннинг экрани умуман ромсиз, балки аксинча – дисплейнинг қирралари қайрилиб, корпусни ёпиб туради. Экраннинг фақатгина тўрт чеккаси эмас, балки бутунича ўзи қайрилма шаклда.
Смартфоннинг орқа панели ҳам шишадан ишланган; бу эса унга симсиз қувватланиш, шунингдек, Galaxy S10 (сотиб олиш) флагманлари сингари бошқа гаджетларни симсиз қувватлаш имконини беради. Корпус ичида металлдан ишланган шасси жойлашган.
Гаджетнинг олд камераси ва бошқа датчиклари дисплейнинг юқори қисмидаги қайрилган ҳудудига ўрнатилган. Дактилоскопик датчик ҳам экраннинг ўзига интеграция қилинган.
Бош камера орқа панелнинг юқори қисми ўртасида, тиккасига жойланган.
Эътибор берган бўлсангиз, мазкур компания Galaxy S9 флагманида Galaxy S8 моделининг деярли ўзини такрорлаб, айрим жиҳатларини яхшилаган, холос. Таҳлилчиларга кўра, Galaxy S11 модели ҳам инқилобий смартфон бўлмасдан, Galaxy S10 моделининг яхшиланган кўриниши бўлади. Юқоридаги патентда тасвирланган флагман эса 2021 йили, Galaxy S12 модели сифатида тақдим этилса керак.
ЎҚИНГ: Samsung энг антиқа дизайнли смартфонни тайёрлаяпти, лекин бу Galaxy Fold ёки Galaxy Note 10 эмас!
