Samsung кутилмаганда «тешик» дисплейли Galaxy A9 Pro (2019) смартфонини намойиш қилди!
Жанубий кореялик техногигант ўз расмий сайти орқали Galaxy A9 Pro (2019) русумли смартфонини эълон қилди. Аслида бу – жорий ойнинг бошида Хитойда сотувга чиққан Galaxy A8s моделининг халқаро версиясидир.
ЎҚИНГ: «Тешик» экранли Galaxy A8s савдога чиқди – нархи билан танишинг!
Биламизки, Galaxy A8s модели Samsung компаниясининг Infinity-O дисплейли илк смартфонидир. Яъни, унда олд камера экраннинг фаол қисмидаги «тирқиш»га жойланган.
Galaxy A9 Pro (2019) модели ҳам Galaxy A8s’нинг асосий хусусиятларини сақлаб қолган. Унинг экрани диагоналига 6,4 дюймлик бўлиб, томонлари ўзаро 19,5:9 нисбатда. «Тешик» дисплей тасвирларни 2340х1080 пикселлик аниқликда етказиб бера олади.
Асосий камера нақ учта – 24, 10 ва 5 мегапикселлик датчикларни ўз ичига олган. Дисплейдан «мўралаб» турган селфи-камера бўлса 24 мегапикселлик сенсорга эга.
ЎҚИНГ: Galaxy A60 – «тешик» дисплейли нисбатан арзон смартфонни апрелда кўрамиз!
Galaxy A9 Pro (2019) аппарат таъминоти асосини Qualcomm Snapdragon 710 процессори ташкил этади. Смартфон 6 ГБ тезкор ва 128 ГБ доимий хотирага эга. Дактилоскопик датчик орқа панелга жойланган, аккумуляторининг ток сиғими 3400 мА/соатга тенг. Смартфон замонавий USB Type-C порти билан жиҳозланган, қулоқчин учун 3,5 миллиметрлик аудиотирқиш кўзда тутилмаган. Android операцион тизимининг 8.1 Oreo талқини бошқаруви остида ишловчи ушбу смартфон корпуси ўлчамлари 158,4х74,9х7,4 миллиметрга тенг бўлиб, у 173 грамм тош босади.
Samsung Galaxy A9 Pro (2019) корпусининг рангига кўра кўк, кул ранг ва яшил тусларда таклиф этилмоқда. Сайтда унинг Жанубий Кореядаги нархигина эълон қилинган – 533 АҚШ долларига тенг. Ўз юртида уни 28 февралдан савдога чиқаришади, хорижий бозорга чиқиш вақти ва нархлари ҳозирча номаълум.
ЎҚИНГ: Samsung энди Xiaomi билан беллаша олади: Galaxy M смартфонлари кутилганидан ҳам арзон экан!
