«Суперсамарадор» Redmi Note 10 5G аллақачон TENAA’да: «жонли» суратлари ва хусусиятлари
Xiaomi компанияси Redmi Note 9 туркумида бир нечта смартфонларини тақдим этиб улгурган. Ҳали тўққизинчи авлод смартфони – Redmi 9 намойиш қилинмай туриб, у ўнинчи авлод Redmi фаблетини ҳам тайёрлаб улгурибди!
ЎҚИНГ: Тақдим этилмаган Redmi 9 модели Xiaomi сайтига, Redmi 10X иккаласи яна Geekbench’га ҳам чиқди!
TENAA регулятори маълумотлар базасида Redmi Note 10 5G смартфонининг суратлари ҳамда техник хусусиятлари ҳақида маълумотлар пайдо бўлди.
Янги қурилма ўз дизайнига кўра олдинги авлод Redmi Note 9 смартфонларидан айтарли фарқ қилмайди. Бош камера квадрат блокда жойлашган бўлиб, унда учта сенсор ва фоточақноққа кўзимиз тушади. Бош модул 64 мегапикселлик аниқликда экани айтилмоқда. Қурилманинг олд камераси экраннинг томчисимон кемтигига ўрнатилган ва 16 мегапикселлик якка датчикка эга.
Бошқа хусусиятларига келадиган бўлсак, Redmi Note 10 5G корпусининг ўлчамлари 164,15х75,75х8,99 миллиметрга, вазни эса 208 граммга тенг. Унинг экрани OLED-матрицали бўлиб, ўлчами 6,57 дюймлик, аниқлиги эса 2400х1080 пикселлик.
ЎҚИНГ: Redmi янада арзон 5G-смартфон тайёрлади, хусусиятлари билан танишамиз!
Xiaomi Group China президенти ва Redmi бош директори Лу Вейбинг (Lu Weibong) ўзининг Weibo аккаунтида навбатдаги Redmi смартфони «суперсамарадорлик»ка эга бўлиши ҳақида пост эълон қилган. Унинг остига эса MediaTek компаниясининг 18 май куни бўлиб ўтадиган онлайн тақдимоти ҳақидаги постери ҳаволасини жойлаган. Тайванлик чипсоз унда Dimensity 800 туркумидаги янги – 2,6 ГГц частотали саккизта ядро ва 5G-модемни ўзида жамлаган процессорини намойиш қилади. Англаганингиздек, Redmi Note 10 5G айни шу чипсет базасига қурилмоқда.
Redmi бу фаблетини 4520 мА/соатлик аккумулятор ва 22,5 ваттлик тезкор қувватлаш технологияси билан таъминлаган. Харидорларга уни 6/64, 6/128, 8/128 ва 8/256 гигабайтлик конфигурацияларда таклиф этишади.
Redmi Note 10 5G энг сўнгги – Android 10 операцион тизими базасида тайёрланган MIUI 12 график қобиғига эга. Xiaomi ўтган йилги графигига амал қилса, бу смартфонини шу ёзда намойиш қилади.
ЎҚИНГ: РАСМИЙ РЎЙХАТ: MIUI 12’гача янгиланувчи 32 моделдаги смартфон
