Танқидлар иш берди – Apple ғолибларни тақдирлайдиган бўлди. Фототанловда сиз ҳам қатнашинг!
Куни кеча Apple корпорацияси iPhone камерасида олинган фотосуратлар танловини эълон қилган эди. Лекин унинг ғолибларига бирор моддий рағбатлаштириш белгиланмаганлиги танқидларга сабаб бўлди.
ЎҚИНГ: Apple хасислиги учун маломатга қолди: «Айфон берса, асакаси кетармиди!?.»
#ShotOniPhone ҳэштегли танловда айфонда олинган суратларнинг энг яхши ўнтасини Apple ўз реклама плакатларида, расмий сайтида ва ижтимоий тармоқлардаги аккаунтларида эълон қилиш билангина чекланмоқчи эди. Унинг хасислигини танқид қилиб ёзилган кўплаб фикрлардан сўнг корпорация ушбу фототанлов қоидаларига ўзгариш киритди.
Хуллас, танлов қоидалари акс эттирилган ҳужжатдаги «Мукофот пул қийматига эга эмас» деган қисми янги – «...ғолиблар ўз ишларидан рекламаларда фойдаланилганлик учун лицензияга кўра ҳақ оладилар» сўзлари билан алмаштирилган. Аммо компания бунда мукофот пулининг миқдорини аниқ айтмаган.
Шундай бўлса-да, iPhone эгаларига 7 февралгача давом этувчи мазкур танловда қатнашишни тавсия қиламиз. Иштирок этиш тартиби билан эса қуйидаги хабаримизда танишишингиз мумкин.
ЎҚИНГ: iPhone’ингиз борми? Марҳамат – Apple танловида қатнашинг!
