Ярим йил кутилган смартфон айтилганидан нақ минг долларга қиммат нархда сотувга чиқяпти!
Huawei шу йилнинг март ойидаёқ намойиш этган букламафон – Mate X ҳалиям савдога чиқарилмади. Кечагина унинг бозорга ўз рақиби – Galaxy Fold флагманидан кўра арзонроқ нархда кириб бориши учун айрим қисмларини соддалаштиришаётгани айтилган эди.
ЎҚИНГ: Huawei раҳбари аэропортда Mate X билан «қўлга тушди»!
Бугун эса Huawei ўз ватанида Mate X букламафонининг тез орада бозорга чиқишига бағишланган матбуот анжумани ўтказди. Буни қарангки, техногигант уни кутилганидек арзонроқ эмас, балки аксинча – қимматроққа сотишини эълон қилган!
Хулласи калом, бошланғич конфигурациядаги – Kirin 980 процессори ҳамда 8/512 гигабайтлик тезкор/ички хотирали Huawei Mate X учун хитойлик харидорлар салкам 2400 доллар тўлашларига тўғри келади! Бу эса кутилаётган нарх – 1414 доллардан деярли минг долларга қиммат, деганидир! Дарвоқе, бу – ҳали Хитойдаги нархи, глобал бозорда эса уни янада қиммат сотишлари аниқ!
Huawei ушбу энг инновацион флагманининг илғор конфигурацияли вариантини кейинги йил сотувга чиқаради. 5G-модемни ўз ичига олган Kirin 990 чипсетига ҳамда 12/512 гигабайтлик хотирага эга ушбу модификациянинг нархи эса ўшанда маълум бўлади.
Дарвоқе, яқинда бўлиб ўтган ICTWEEK 2019 ҳафталиги доирасидаги ICTEXPO 2019 кўргазмасида иштирок этган Terabayt.uz жамоаси Huawei Mate X букламафонини ишлатиб кўрган. Ушбу жараённинг видеосини мана бу ҳавола орқали YouTube-каналимизда томоша қилишингиз мумкин.
ЎҚИНГ: Huawei Mate X’ни аллақачон Aliexpress’дан сотиб олиш мумкин, фақат нархи қўрққулик!
