Samsung elektromobillar uchun akkumulyatorlar ishlab chiqaradi
Janubiy Koreyaning Samsung kompaniyasi o‘zining Vengriyadagi zavodida elektromobillar uchun litiy-ionli batareyalarni ishlab chiqarishni rejalashtirmoqda. Shu maqsadda kompaniya Vengriyaning Gyod shahrida joylashgan zavodini qayta ixtisoslashtirish uchun taxminan 358 million dollarga teng mablag‘ sarflamoqchi. Avvalroq ushbu zavodda elektron-nurli o‘tgazgichlar va DVD-pleyerlar ishlab chiqarilgan. Bu aynan litiy-ionli akkumulyatorlarni tayyorlashga ixtisoslashgan kompaniyaning uchinchi zavodi bo‘ladi (qolgan ikkita zavod Janubiy Koreyaning Ulsan va Xitoyning Sian shaharlarida joylashgan).
Fabrika 2018 yilning ikkinchi yarmidan boshlab batareyalarni ishlab chiqarishi ko‘zda tutilgan. Hozircha zavodning yillik ishlab chiqarish quvvati haqida ma’lumot berilmagan. Ammo koreyalik gigant yiliga 50 mingta avtomobilga akkumulyator tayyorlashni rejalashtirgan. Agar elektromobil batareyasining sig‘imi o‘rtacha 50 kV/st deb olinsa, zavodning yillik quvvati 2,5 GVt/soatga teng bo‘ladi. Bu boshqa ana shunday fabrikalarga solishtirganda unchalik katta ko‘rsatkich emas. Tesla kompaniyasining Nevadadagi yirik fabrikasi 35 GVt/st quvvatga ega.
Samsung bir paytlar avtomobillar ishlab chiqarganligini hisobga olsak, koreyalik gigant avtomobilsozlik sohasiga jiddiy yondashayotganini anglash mumkin.
