To‘liq ro‘yxat: Apple devayslariga iOS 11.4 talqini bilan qo‘shilgan imkoniyatlar
Kupertinolik texnogigant o‘z mahsulotlari uchun asosiy dasturiy ta’minot – operatsion tizimni ham o‘zi ishlab chiqishi hamda uning himoyasi mustahkamligi bilan tanilgan. Jumladan, 4 iyunda boshlanadigan WWDC 2018 anjumanida u iOS 12 operatsion tizim talqinini taqdim etmoqchi.
O‘QING: Nihoyat, Apple rasman iPhone SE 2 va boshqa gadjetlar taqdimotiga taklifnoma tarqatdi!
Shunday bo‘lsa-da, ungacha ham «tishlangan olmali» korporatsiya o‘z operatsion tizimini iOS 11.4 talqinigacha yangiladi. Ushbu yangi talqinda Apple gadjetlari uchun bir qator yangi imkoniyatlar taqdim etilgan. Ularning ro‘yxati quyidagicha:
- iMessage’dagi xabarlar endi foydalanuvchining barcha Apple qurilmalari – smartfon, planshet, pleyer va kompyuter orasida o‘zaro sinxronlashadi. Buning uchun ularning barchasiga operatsion tizimning so‘nggi talqini o‘rnatilgan bo‘lishi lozim. Bundan keyin xabarlar mahalliy saqlagichda – qurilma xotirasida emas, balki «bulut»da – Apple servisida saqlanadi. Shuningdek, ular ikki tomonlama kriptografiya tizimi bilan shifrlanadi.
- Yangi talqin AirPlay 2 texnologiyasini ham qo‘llab-quvvatlaydi. Mazkur texnologiya bir nechta simsiz akustika tizimlaridan multirum tizimini yaratish va butun uydagi musiqani boshqarish imkonini beradi.
- HomePod kolonkasi endi multirum tizimini qo‘llab-quvvatlaydi. Bundan tashqari, endi ularning ikkitasi stereo-juftlik tashkil etib, bitta kolonkadan ko‘ra balandroq va sifatliroq jarang socha oladi.
- HomePod’ga o‘rnatilgan Siri yordamchisi endi kalendarga voqealarni qo‘shishi va rejalashtirilgan tadbirlarni foydalanuvchiga eslatishi mumkin.
- Operatsion tizimdagi va unda boshidan o‘rnatilgan ilovalardagi mayda nuqsonlar bartaraf etilgan.
Hali kechagina – 29 may sanasida taqdim etilgan iOS 11.4 talqinini o‘rnatib olish mumkin bo‘lgan Apple devayslari rusumlari esa mana bu maqolamizda ko‘rsatilgan.