Apple saytida iPhone X'ning 6 muhim jihati e’lon qilindi

Apple kompaniyasi o‘zining internet tarmog‘idagi sahifasida iPhone X flagmaniga avvaldan buyurtma berish sanasi va sotuvga chiqish vaqtini e’lon qildi. Unga ko‘ra 27 oktyabrdan, Toshkent vaqti bilan 12:00 dan boshlab smartfonga buyurtma berish va 3 noyabrdan jahonning 55 mamlakatida bu smartfonni xarid qilish mumkin. Apple savdoning ilk bosqichida iPhone X bilan bog‘liq tanqislik yuzaga kelishini ma’lum qilgan.

Biz esa quyida Apple.com saytida iPhone X'ga oid taqdim etilgan promo-ma’lumotlarni taqdim qilamiz. Undan flagmanga oid 6 jihat e’lon qilingan.

— Dizayn va ekran. Old panelni to‘liq egallab olgan 5,8 dyuymli ekran. Bu -- ham orqa, ham old panel pishiq shisha bilan qoplangan kompaniya tarixidagi panellari eng chidamli smartfon.

— Face ID. Sizning qiyofangiz — sizning parolingiz. Tizimga kirishning yangi usulini taqdim qilamiz va uning yordamida siz smartfonga birgina qarash orqali uni blokirovkadan chiqarasiz.

— TrueDepth. Bu kichkinagina maydondan juda ko‘p imkoniyatlar o‘rin olgan. Shulardan biri TrueDepth kamerasi bo‘lib, u FaceID texnologiyasi, "Portret rejim"ida suratga olish, "Portret yorug‘ligi" va "Animoji" kabi zamonaviy funksiyalarga xizmat qiladi.

— To‘liq yangilangan kamera texnologiyasi. Optik barqarorlashtirish va studiya sifatida suratga oluvchi yangicha "Portret rejimi", 12 megapikselli qo‘sh sensorlar har bir kadrni eng maqbul usulda qayta ishlaydi.

— A11 Bionic protsessori. Smartfonlarda ilk marotaba tatbiq qilingan va sekundiga 600 milliard operatsiyani bajaradigan neyronli tarmoq o‘tkazgichlariga ega eng kuchli va aqlli chip.

— Simsiz quvvatlash. Flagmanni shunchaki qo‘ying va u o‘zi quvvat oladi. iPhone X simsiz texnologiya olami uchun yaratilgan.