Golografik displeyli ilk smartfon yaratildi
Keyingi paytlarda yangi smartfonlar
bizni avvalgidek hayratga solmay qo‘ydi, sezyapsizmi? To‘g‘ri, ishlab chiqaruvchilar ularni
tobora yupqaroq, yengilroq, kameralarini kuchliroq qilishga, ekrani atrofidagi
romni imkon qadar ingichkalashtirishga urinishyapti. Biroq bularning bari avval
yaratilgan yechimlarning takomillashuvi, xolos. Bu borada bir necha yildan beri inqilobiy
degulik biror texnologiya ixtiro qilingani yo‘q.
Professional raqamli kameralar ishlab chiqaruvchi mashhur RED kompaniyasi ayni
mana shu inqilobni amalga oshirish uchun ham maydonga tushgan ko‘rinadi. U golografik
ekranli dunyodagi birinchi smartfon – RED Hydrogen One qurilmasini ishlab
chiqarayotganini ma’lum qildi, deb yozadi
Hi-News.ru sayti.
Hydrogen One smartfoni diagonali 5,7 dyuymga teng bo‘lgan golografik displey bilan jihozlangan. Bu ekran an’anaviy 2D-tasvirlarni
ko‘rsatishdan tashqari, golografik kontentni, 3D-kontentni hech bir maxsus
ko‘zoynaksiz aks ettiradi. Shuningdek, u virtual va to‘ldirilgan
reallik kontentlarini
kam ko‘rsata biladi.
Betakror displeyidan tashqari, smartfonga maxsus H3O algoritmi joriy etilgan, u oddiy stereo tovushlarni avtomatik tarzda to‘laqonli hajmli audioga aylantirib beradi.
Qurilma Android operatsion tizimi boshqaruvi ostida ishlaydi va, ishlab chiqaruvchining ta’kidlashicha, kelajakda ham biror uyali aloqa operatoriga biriktirib
chiqarilmaydi.
Aftidan, bu smartfon modulli bo‘ladi, biroq uning qo‘shimcha modullari
haqida hozircha biror ma’lumot berilmagan. Kompaniyaning rasmiy press-relizida ham faqatgina bo‘lajak
gadjetning afzalliklari qisqacha sanab o‘tilgan, xolos.
Yangi devaysning RED kameralari bilan moslashtirilishi aniq, bu esa rejissyor
va operatorlarga smartfonni o‘ziga xos boshqaruv pulti sifatida qo‘llash, shuningdek,
kamerada olingan tasvirlarni ko‘rib chiqish imkonini beradi.
RED Hydrogen One kelgusi yilning birinchi choragida savdoga chiqariladi, uning narxi ham allaqachon ma’lum. Smartfon ikki xil korpusda taqdim etiladi va narxiyam shundan kelib chiqadi. Titan korpusli modeli 1595 dollar, alyuminiydan ishlangan variant esa anchagina arzon – atigi 1195 dollar turadi.