«iPhone 8» allaqachon Xitoyda 100 dollardan sotuvga chiqdi! (+video)
Apple’ning «yubiley» smartfoni hali
taqdim etilmay turib, Xitoyda allaqachon romsiz «iPhone 8» savdoga qo‘yilgan. Bu –
uning aynan uning o‘ziday qilib ishlangan, hatto qutilariyam originaliga o‘xshagan sifatli
qalbaki mahsulotdir, deb yozadi
AKKet.com.
Butun dunyo ahli sabrsizlik bilan kutayotgan mazkur flagmanga AQShlik
videobloger buyurtma bergan. Mahsulot Xitoydan yetib kelgach, uning videotavsifini
tayyorlab, o‘zining YouTube-kanaliga joylagan.
Bir qarashda, buni haqiqiy iPhone 8 deb o‘ylash ham mumkin. U barcha
ommabop ranglarda sotuvga chiqarilgan, jumladan, yangi (RED) Special Edition tusida
ham. Videobloger aynan mana shu rangdagisini ochib va tekshirib, ishlatib ko‘rishga qaror
qilgan. Shuningdek, smartfonning ichini ochib, ayrim detallariga ham ma’rif
bergan.
Tushungan odam darrov fahmlaydiki, bu «olmali» kompaniyaning yangi
mahsuloti emas, balki uning sifatli ishlangan klonidir. Videolavha muallifining
ta’kidlashicha, u mazkur smartfonni Xitoydan atigi 100 AQSh dollari evaziga buyurtma
berib oldirgan. Apple’ning haqiqiy flagmani narxi bundan naq o‘n baravar yuqori
ekanligini hamma bilsa-da, sotuvchi bu mahsulotni original, deb ishontirishga rosa
harakat qilgan.
Aniqlanishicha, «xitoycha iPhone 8» xuddi iOS 10’ga o‘xshatib yaxshigina
niqoblangan Android operatsion tizimi boshqaruvida ishlaydi. Garchi ekrani
smartfonning old panelini to‘liq egallagan bo‘lsa-da, qurilmani ishga tushirganda
ko‘rinadiki, aslida displey uning anchagina kichkina qismida joylashgan. Tabiiyki,
ekranning o‘zi ham past sifatli, 3D Touch texnologiyasi esa unda dasturiy emulyator
yordamida ishlaydi.
Marhamat, o‘zingiz tomosha qiling:
Videorolik muallifining aytishicha, bunday «iPhone 8»lar Xitoyda sotuvga chiqqaniga allaqachon bir necha hafta bo‘lgan. Yaqin kelajakda bu smartfonlar boshqa mamlakatlarning bozorlariga ham kirib borishi mumkin. Tabiiyki, xaridorlarni ishontirish maqsadida uni asl mahsulot narxiga yaqin – qimmatroq sotishadi. Ularga aldanib qolmaslik uchun, e’tiborli bo‘lishni va faqat sinalgan, ishonchli savdo nuqtalaridan xarid qilishni tavsiya etamiz.
Eslatib o‘tamiz, xitoyliklar bundan oldin ham qalbaki iPhone 8 ishlab chiqarishgan edi, ammo bu yangisi to‘liq jamlanmasi bilan sotilayotgani
e’tiborga loyiq.