Kompyuter samaradorligiga antivirus qanday ta’sir ko‘rsatadi?
Turli ziyonkor dasturlar – viruslardan himoyalash uchun kompyuterlarimizga antiviruslar o‘rnatib qo‘yamiz. Ammo bu himoyachilarning o‘zlari qurilmaning «oqsab» ishlashiga sabab bo‘lishini bilamizmi?
O‘QING: Rus xakerlari «Kasperskiy» yordamida AQSh Milliy xavfsizlik agentligiga hujum qilishgan
Germaniyaning AV-Test internet-portali turli antiviruslarning ishi kompyuter ishlashiga qanday ta’sir etishini tadqiq etib ko‘rdi. Tadqiqot uchun yetarlicha kuchli kompyuter tanlandi: 3,4 GGs chastotada ishlovchi Intel Core i7-3770 protsessori, 16 gigabayt tezkor xotira hamda Samsung’ning 512 gigabaytlik SSD-diski.
Taxmin qilinganidek, antiviruslar kompyuterning ishlash samaradorligiga salbiy ta’sir etishi ma’lum bo‘ldi.
O‘QING: Kasperskiy bepul antivirus chiqardi va boshqa antiviruslarni «ilma-teshik» deb atadi!
Testlarning ko‘rsatishicha, kompyuterning samaradorligini barcha antiviruslar o‘rtacha quyidagicha pasaytirar ekan: saytlarning yuklanishi 11-16 foizga, ilovalarning ishga tushishi 9-15, o‘rnatilishi 26-35, fayllarning ko‘chirilishi esa 7-18 foizga sekinlashadi.
Masalan, Windows 10’ning o‘ziga boshidanoq o‘rnatilgan Windows Defender antivirusi ilovaning o‘rnatilishini 54 foizga, ularning ishga tushirilishini 9 foizga, veb-saytlarning yuklanishini esa 10 foizgacha sekinlashtirishi aniqlandi.
Barcha ommabop antiviruslarning kompyuter samaradorligiga qanday ta’sir ko‘rsatishi haqidagi batafsil ma’lumotni AV-Test saytining tegishli sahifasidan olish mumkin.