Samsung J3 (2017) sotuvga chiqdi: pulni tejaymizmi?
"Galaxy
J" turkumining 2017 yilda ishlab chiqarilgan eng arzon
modellaridan biri — ayni paytda xalqaro smartfon bozorida
215 AQSh dollaridan sotilmoqda. Metall korpus, orqa panelda antenna uchun plastik uloqlardan foydalanilgan
smartfon dizayni ko‘rinishdan Samsung'ning hamyonbop smartfonlarini
eslatib yuboradi: kamtarin va ixcham, yig‘ilishi pishiq, Samsung gadjetlari orasida bu qadar mustahkami kamdan-kam.
Biroq smartfon ehtiyotkorlikka muhtoj: metall o‘ta nozik,
orqa panel oson qirilishi mumkin. Old panel ham noiz, barmoq izlari va dog‘-dug‘ga qarshi plyonka qoplamasi mavjud bo‘lsa ham, u qadar ideal deb
bo‘lmaydi.
Ekran: u qadar ham, ya’ni flagmanlarniki kabi sifatli AMOLED
deb bo‘lmaydi
Displey
diagonali o‘rtacha — 5 dyuym. Uning piksellar sig‘imi puliga yarasha -- HD
(ba’zi suratlarda piksellar ko‘rinib turadi). Ekran matritsasi — SuperAMOLED.
Smartfonning "katta akalari" J5 va J7 smartfonlarida ham SuperAMOLED matritsa
bo‘lsa-da, J3 ekrani bilan solishtirib ko‘rganda, hamyonbop talqindagi matritsa sifati yaqqol ko‘rinadi: tasvir aks etishi ekran markazida
va burchaklarida 2 xil, rang-tasvir uzatishi yuqori darajada emas.
Displey yorqinligi ham barchani xursand qilmasligi mumkin, quyosh nuri ostida ekran o‘zini yo‘qotib qo‘yadi. Bu o‘rinda hamyonbop ishlab chiqarishda peshqadam bo‘lgan Xiaomi yoki Meizu kabi, nisbatan arzon, ammo siatli bo‘lgan
IPS matritsadan foydalanilgan yaxshi edi.
Tormoz"lanish kuzatiladi
Hamyonbop haqida gap ketganida, qotib qolishlar va uzilishlar
Samsung'ning tejamkor
smartfonlari uchun global muammo. Garchi, smartfonda eng yangi — 7-avlod Android
operatsion tizimi joriy qilingan bo‘lsa ham, dasturlarning tezkor ishlashi foydalanuvchini qoniqtirmasligi mumkin.
Sababi —
protsessor kuchsizroq. Galaxy J3 samaradorlikda o‘zidagi 4 yadroli Exynos 7570 yoki Qualcomm Snapdragon 4xx
protsessori, 2 gigabaytli tezkor xotirasi bilan maqtana olmaydi.
Stereo ovozdan umid qilmasa ham bo‘ladi, karnayning ovoz uzatishi u qadar baland emas, biroq toza va audio quloqchinlarda yaxshi yangraydi.
Doimiy
xotira minimal — 16 GB, shu bilan birga microSD xotira fleshkasi uchun bo‘lmacha
mavjud. Bu bo‘lmachaga 2 ta sim-karta hamda ular bilan birga bitta xotira kartasini
joylashtirish mumkin.
Akkumulyator sig‘imi va quvvatdorlik
Akkumulyator
bor-yo‘g‘i 2400 mA
soat bo‘lsa ham, uning to‘liq quvvat bilan ishlash vaqti — qoyilmaqom! Smartfon to‘liq quvvat bilan videoni 10 soat davomida ijro etishi mumkin. J3 (2017)
smartfonida o‘yinlarni uzog‘i bilan 5 soat mobaynida uzluksiz o‘ynash mumkin. Umuman olganda, bu
kuchsiz prosessor hamda tejamkor
AMOLED ekranga xos natija.
Ammo,
xursand qiladigan tomoni -- smartfondan o‘rtacha, me’yorida foydalanganda uni har kuni quvvatlash talab qilinmaydi. Bu esa
ko‘pchilik uchun ayni muddao.
Kamera oddiy, biroq atofokus aniq ishlaydi
Samsung Galaxy J3 kameralari — 13 megapikselli bosh kamera f/1,9 aperturaga ega hamda old kamera 5 megapikselli bo‘lib, f/2,2 yorug‘lik linzasiga ega. Ularning manzarani matritsaga muhrlash sifatini yomon deb bo‘lmaydi. Yaxshi deyish ham qaysidir ma’noda bir oz bo‘rttirish bo‘lishi mumkin: matritsada dinamik diapazonni qamrab olish imkoni u qadar yuqori emas, shu bois ba’zida rang-tasvirni tabiiy muhrlashga qiynaladi. Ammo yaxshi tomoni — avtofokus 90% holatda aniq ishlaydi. Hatto tunda ham.
Quyida Samsung Galaxy J3 kamerasida olingan suratlarga baho bering.
Umuman olganda, kamerada olingan suratlar sifati yomon emas.
Internet sekin ishlaydi
Samsung
Galaxy J3 aloqaning 4G
tarmog‘ida ham ishlaydi. To‘g‘ri, imtihonlar jarayonida J3 to‘plagan natijalar J5 va J7 smartfonlariga qaraganda 8-9% yomonroq. Shu bilan birga,
Speedtest.net resursidagi imtihonlarga ko‘ra smartfonda ma’lumotlarni qabul qilish tezligi ham past -- 6,30 Mbit/s. Boisi, hamyonbop smartfonga arzon
chipset va radiomodul o‘rnatilgan.
Navigatsiyaning
ishlashi super: GPS sun’iy yo‘ldosh tizimiga Galaxy J3 15 sekundda ulanadi, ko‘z
ochib yumguncha ishga tushadi.
Kuchli jihatlar
Samsung
Galaxy J3 (2017)'ning kuchli tomonlari — to‘liq quvvat bilan uzoq ishlashi va koreyalik
ishlab chiqaruvchiga xos an’anaviy dizayn yechimi. Shuningdek, 2 ta SIM-karta va alohida xotira kartasi uchun
bo‘lmacha mavjudligi ham ko‘ngildagidek.
Terabayt fikri
215 AQSh dollari evaziga siz
nomi chiqqan va ishonchni oqlagan brendning puliga yarasha smartfonini olasiz. To‘g‘ri, bu pulga Xiaomi'ning
yaxshi gadjetlarini yoki Asus ZenFone 3 Max kabi ichki platformasi nisbatan kuchliroq, barmoq izlari skaneriga ega va
kamerasi yaxshiroq smartfonlarini xarid qilish mumkin. Yoki bu
narxga Meizu U20 kabi sifatli ekranga ega, korpusi shisha va metalldan
tayyorlangan smartfonlarni ham xarid qilish mumkin.
Jumladan, bu narxga 5 dyuymli Lenovo K6, Xiaomi Redmi 4X, Nokia 3 smartfonlarini sotib olsa bo‘ladi. Ammo, Samsung J3 (2017)'ning bitta ustun tomoni bor — SuperAMOLED ekran, uzoqqa yetadigan akkumulyator, va albatta Samsung degan brend.