OnePlus 8 туркумидаги энг арзон смартфон Geekbench’да: нақ 12 ГБ «оперативка»!
«Флагманлар кушандалари» бўлмиш смартфонлари билан танилган хитойлик компания OnePlus 8 ҳамда OnePlus 8 Pro моделларини апрелнинг ўртасида намойиш қилган. Ушбу туркумдаги OnePlus 8 Lite қурилмаси ҳақида улардан ҳам олдин хабарлар чиққан, лекин негадир ҳалиям уни тақдим этишмади.
ЎҚИНГ: OnePlus 8 Pro'нинг ичини очиб кўришди (+видео)
OnePlus 8 уни тез орада намойиш этса керак – 1 июнь куни мазкур қурилма Geekbench сервисида текшириб кўрилди. Процессорининг битта ядросини ишлатганида у 612 балл олган бўлса, барча ядролари иштирокидаги имтиҳонда 1955 баллик натижа кўрсатган:
Лекин энг қизиғи – гарчи туркумнинг энг арзон вакили бўлса-да, OnePlus 8 Lite моделининг тезкор хотираси ҳажми 12 гигабайтлик экан! Таққослаш учун келтириб ўтсак, унинг иккала «оға»си ҳам 8 гигабайтлик (LPDDR4X тоифали) ва 12 гигабайтлик (LPDDR5 тоифали) тезкор хотира чипларига эга вариантларда чиққан. Демак, компания туркумнинг кенжаси борасида ҳам шунақа йўл тутяпти.
Бенчмарк юқоридаги скриншотда кўрсатишича, OnePlus 8 Lite самарадорлигини таъминлашга 1,8 ГГц.лик такт частотасида ишловчи Qualcomm процессори масъул. Ҳозиргача тарқалган миш-мишларга қарганда, унинг олд камераси 16 мегапикселлик датчикка эга; 4000 мА/соатлик батареяси эса 30 ваттлик технология бўйича тезкор қувватлана олади.
ЎҚИНГ: OnePlus 8 Pro тезкорми ёки бир ярим баравар қиммат Galaxy S20 Ultra? «Жонли» тестда кўрамиз!
