Телефон учун "Counter-Strike 1.6" ўйининг янгиси чиқмоқда
"Отишма ўйин" деганда биринчи бўлиб xаёлга келадиган Counter-Strike 1.6, афсуски, мобил қурилмалар учун чиқарилмаган, лекин ундан илҳомланиб яратилган Special Forces Group 2 мобил ўйини смартфонда ҳам афсонавий шутер тажрибасини етказиб бера олади. Android учун Forge Games, iOS учун эса GD Company томонидан тақдим қилинадиган ўйин бугунги кундан 100 миллиондан ортиқ ўйинчиларга эга ва эндиликда унинг янги қисми чиқарилиши маълум бўлди.
Икки кун олдин Forge Games ўзининг расмий саҳифаларида S.F.G. 2 шутерининг давоми Special Forces Group 3 номли ўйиннинг очиқ бета синовини бошлаганини эълон қилди. Яхшиланган график кўринишлар ва янги стилдаги менюга эга бўлган ўйинда янги хариталар, шунингдек, қуроллар ва қаҳрамонлар учун янги скинлар мавжуд.
Ўйиннинг Ўзбекистон, Озарбайжон, Арманистон, Беларус, Грузия, Қозоғистон, Қирғизистон, Молдова, Россия, Тожикистон, Туркия ва Украина давлатлари учун очиқ қилинган бета версиясини ҳозирда Android учун Google Play Store'дан юклаб олиш мумкин (ҳавола).
