AnTuTu’да барча флагманларни «ер тишлатган» янги рекордчи чиқяпти!
AnTuTu бенчмаркида ҳозиргача энг юқори – 606 389 балл олган смартфон Oppo Find X2 Pro бўлади. Аммо энг кучли смартфонларни аниқлаган AnTuTu глобал рейтингига Хитой бозоридаги энг кучли ўнта флагмандан бирортаси ҳам кирмаган.
ЎҚИНГ: Meizu 17 тақдимотдан аввал AnTuTu’да: лидер эмас, лекин ТОП-ўнталикда!
Oppo компанияси бугун, яъни 13 апрель куни бошқа сериядаги – Oppo Ace 2 флагманини тақдим этяпти. Ўтган ҳафтада унинг AnTuTu имтиҳонида 560 000 баллдан ошиқ натижа кўрсатгани ҳақида маълумот чиққанди. Аммо ишлаб чиқарувчи эълон қилган расмий видеороликка кўра, мазкур бенчмаркда у нақ 627 553 балл билан рекорд ўрнатган!
Лекин масаланинг бошқа томони ҳам бор: Oppo Ace 2 (ёки Oppo Reno Ace 2) ушбу тестда дастлаб 615 984 балл олган. Кейин эса смартфонни музлатгич ичига жойлаб, қайтадан AnTuTu синовини ўтказишганида, у янада юксак – 627 553 баллик натижа кўрсатган!
Oppo Ace 2 флагмани Qualcomm компаниясининг Snapdragon 865 процессори базасига қурилган. Унинг экранида тасвир янгиланиш частотаси 90 герцлик бўлса, сенсор қатлами 180 герцлик частотада янгиланади. Смартфонни 4D-совитиш тизими, тўлақонли стереодинамиклар билан таъминлашган ҳамда Dolby Atmos технологиялари билан бойитишган.
Ишлаб чиқарувчи Ace 2 смартфонига 48 + 8 + 2 + 2 мегапикселлик бош камера ўрнатган. Харидорларга уни 8 ва 12 гигабайтлик тезкор, 128 ва 256 гигабайтлик доимий хотирага эга вариантларда таклиф этишади.
ЎҚИНГ: Ўз эгаларини рози қилган ТОП-10 смартфон (AnTuTu рейтинги, 2020 йил февраль)