Honor 10 Lite тақдим этилди: атиги 200 долларга GPU Turbo ва «сунъий онг»ли кўркам смартфон
Huawei компанияси жорий йилнинг май ойида Honor 10 смартфонини намойиш этганди. Ушбу қурилма хитойлик техногигантнинг энг яхши сотилаётган телефонларидан бири бўлди.
ЎҚИНГ: Honor 10: "Малика"нинг ярим нархли флагмани
Энди эса унинг арзонлаштирилган версияси – Honor 10 Lite тақдим қилинди. Маҳаллий бозорга эса у Honor 10 Youth Edition модели сифатида чиқарилади. Мазкур қурилма Full HD+ форматли (2280х1080 пикселли) LCD-дисплей билан жиҳозланган. Диагонали 6,21 дюймлик экраннинг томонлари ўзаро 19:9 нисбатда бўлиб, тепасида селфи-камера учун томчисимон-думалоқ шаклли «кемтик»ка эга. Huawei’нинг таъкидлашича, кенг форматли бу дисплей корпус олд юзасининг 90 фоизини эгаллаган.
Honor 10 Lite моделига Huawei ўзининг Kirin 710 процессорини ўрнатган. Смартфон тезкор хотираси 4 ва 6, ички хотираси эса 64 ва 128 гигабайтлик талқинларда чиқарилмоқда. Шунингдек, иккинчи SIM-карта ўрнига microSD-карта қўйиш орқали унинг хотирасини кенгайтириш мумкин.
ЎҚИНГ: Бунақаси бўлмаган: Samsung бутун бошли iPad нархида янги microSD-карта чиқарди!
Смартфон корпусининг орқа панелига бармоқ изи сканери ўрнатилган, у 4G VoLTE, Wi-Fi (802.11ac), Bluetooth 4.2 LE ва GPS/ГЛОНАСС модулларига эга. Аккумуляторининг ток сиғими – 3400 мА/соат.
Арзонлаштирилган модел бўлса-да, Honor 10 Lite қўшалоқ (13+2 мегапикселли) асосий ва 24 мегаписеллик олд камераларга эга. Уларнинг иккаласига ҳам «сунъий идрок» жорий этилган бўлиб, фотосуратларни яхшилашга ҳамда тасвирга олинаётган манзараларда саҳналарни «англаб олиш»га хизмат қилади.
Honor 10 Lite қадоқданоқ энг сўнгги – Android 9 Pie талқинидаги операцион тизимга эга. Huawei уни ўзининг инқилобий GPU Turbo технологияси билан ҳам таъминлаган.
Ушбу смартфоннинг 4/64 гигабайтлик тезкор/доимий хотирага эга бошланғич версияси учун 201 АҚШ долларига тенг нарх белгиланган. 6/64 гигабайтлиги 244 долларга нархланган бўлса, илғор – 6/128 гигабайтлиги эса 273 долларга тушади. Хитойнинг ўзида Honor 10 Lite савдоси 27 ноябрдан бошланади, уни оқ, қизил, кўк ва қора рангли корпусларда сотувга чиқаришади. Унинг жаҳон бозорига қачон чиқарилиши ва қандай нархларда сотилиши ҳозирча номаълум. Huawei’нинг айрим русумлардаги смартфонларини эса Terashop.uz интернет-дўконимизда 890 000 сўмдан бошланган нархларда харид қилиш мумкин.
