iFixit тестида яна бир янги флагмани Samsung’нинг юзини ерга қаратди (+видео)
Турли қурилмаларнинг таъмирга яроқлилик даражасини аниқлаш учун уларнинг ичини очиб кўрсатувчи iFixit сервисини биласиз. Яқинда унинг мутахассислари Samsung компаниясининг Galaxy S20 Ultra флагманини текширишгани видеосини эълон қилгандик.
ЎҚИНГ: iFixit рейтинги: 2019 йилнинг энг таъмирга яроқли ва яроқсиз гаджетлари (+видео)
iFixit экспертлари энди жанубий кореялик техногигантнинг Samsung Galaxy S20+ флагманини ҳам «ичак-човоғини ағдариб» текшириб кўришди. Бир сўз билан айтганда, бу смартфоннинг яхши жиҳатлари ёмонларидан камроқ экан.
Мана – Galaxy S20 Plus’нинг ичини очиб, таъмирга яроқлилик даражаси текширилган видеони томоша қиламиз:
Мутахассисларнинг таъкидлашларича, Galaxy S20+ салбий хусусиятларидан бири – уни теришда елимдан жуда кўп фойдаланилганлигидир. Аккумулятор орқа панелга елимлаб мустаҳкам ёпиштирилган, шу боисдан уни алмаштириш ҳатто усталарга ҳам қийинчилик туғдиради. Шунингдек, дисплей ҳам корпусга клейланган – таъмирлаш жараёнида унга шикаст етказмаслик – мушкул масала.
Хулласи калом, iFixit мутахассислари Galaxy S20+ флагманининг таъмирга яроқлилигини 10 баллик тизимда атиги 3 балл, дея баҳолашди. Айтиш керакки, текширувда Samsung Galaxy S20 Ultra ҳам айнан шундай балл олган эди.
