iFixit testida yana bir yangi flagmani Samsung’ning yuzini yerga qaratdi (+video)
Turli qurilmalarning ta’mirga yaroqlilik darajasini aniqlash uchun ularning ichini ochib ko‘rsatuvchi iFixit servisini bilasiz. Yaqinda uning mutaxassislari Samsung kompaniyasining Galaxy S20 Ultra flagmanini tekshirishgani videosini e’lon qilgandik.
O‘QING: iFixit reytingi: 2019 yilning eng ta’mirga yaroqli va yaroqsiz gadjetlari (+video)
iFixit ekspertlari endi janubiy koreyalik texnogigantning Samsung Galaxy S20+ flagmanini ham «ichak-chovog‘ini ag‘darib» tekshirib ko‘rishdi. Bir so‘z bilan aytganda, bu smartfonning yaxshi jihatlari yomonlaridan kamroq ekan.
Mana – Galaxy S20 Plus’ning ichini ochib, ta’mirga yaroqlilik darajasi tekshirilgan videoni tomosha qilamiz:
Mutaxassislarning ta’kidlashlaricha, Galaxy S20+ salbiy xususiyatlaridan biri – uni terishda yelimdan juda ko‘p foydalanilganligidir. Akkumulyator orqa panelga yelimlab mustahkam yopishtirilgan, shu boisdan uni almashtirish hatto ustalarga ham qiyinchilik tug‘diradi. Shuningdek, displey ham korpusga kleylangan – ta’mirlash jarayonida unga shikast yetkazmaslik – mushkul masala.
Xullasi kalom, iFixit mutaxassislari Galaxy S20+ flagmanining ta’mirga yaroqliligini 10 ballik tizimda atigi 3 ball, deya baholashdi. Aytish kerakki, tekshiruvda Samsung Galaxy S20 Ultra ham aynan shunday ball olgan edi.
