Galaxy S20, S20+ ва S20 Ultra’ни улоқтириб, букиб ва сувга чўктириб кўрсатишди – улар қанчалик мустаҳкам? (видео)
Samsung компаниясининг Galaxy S20 Ultra, Galaxy S20 Plus ҳамда Galaxy S20 флагманлари Master Lu бенчмаркининг самарадорлик рейтингида тегишлича дастлабки учта ўринни эгаллаган. Улардан энг зўрининг дроп-тест видеосини ҳам эълон қилганмиз.
ЎҚИНГ: БОШЛАНДИ: Galaxy S20’ларнинг энг мақталган жиҳатида муаммолар чиқяпти!
Хўш, ушбу қиммат смартфонларнинг мустаҳкамлик даражаси қанақа экан ўзи? SquareTrade канали шунга аниқлик киритиш мақсадида ҳар учала моделни бир хил шароитларда синаб, натижалари билан бирга видеода эълон қилди.
Тажрибалар давомида Samsung Galaxy S20, S20+ ҳамда S20 Ultra моделларини 1,8 метрлик баландликдан ташлаб кўришган, 1,5 метрлик чуқурликда ярим соат сувга бўктириб қўйишган ва махсус пресс ёрдамида букиб текширишган.
Мана, қуйида ўша видеолавҳани томоша қиламиз:
Кўриб турганингиздек, учала смартфоннинг кўрсаткичлари ўзаро ўхшаш бўлиб, масалан, ташлаб юборилганида анчагина шикастланган. Букиш тестида Galaxy S20 Ultra энг юқори натижа кўрсатган – 90,7 кг.гача чидаб берган; стандарт Galaxy S20 кўрсаткичи эса энг паст (83,5 кг).
ЎҚИНГ: Galaxy S20, S20+ ва S20 Ultra’ларнинг барча фарқларини биттада кўриб чиқамиз
Умумий ҳисобда шикастланиш даражасига кўра Galaxy S20 модели 81 балл, Galaxy S20+ эса 71 балл олган бўлса, Galaxy S20 Ultra флагманига 70 балл қўйилган. Мазкур баҳолаш усулида балл қанча баланд бўлса, смартфоннинг у ёки бу шароитларда шикастланиш эҳтимоли шунча юқори ҳисобланади.
Шу пайтгача Samsung’нинг янги флагманлар оиласидан айнан энг илғори, яъни Galaxy S20 Ultra моделини кўпроқ синаб кўришмоқда. Жумладан, iFixit бу смартфонни очиб, таъмирга яроқлилигини текширган, машҳур влогер JerryRigEverything ҳам уни чидамлилик синовидан ўтказган.
Galaxy S20 Ultra автономлик тестида iPhone 11 Pro Max’ни зўрға енгган, лекин ғолиб барибир бултурги флагман бўлиб чиққан! Display Mate синовида Samsung Galaxy S20 Ultra янги рекорд ўрнатган; шунингдек, мазкур моделга ҳали сотувга чиқмасиданоқ янгиланиш келган – ундаги ўзгаришлар рўйхатини ҳам эълон қилганмиз.
ЎҚИНГ: Galaxy S20 Ultra таннархи ҳисобланди – Samsung уни неча баравар қимматга сотяпти?
