Redmi Note 9 5G ҳам тайёр: атиги 140 долларлик 5G-смартфон тезкор қувватлана олади!
«Хитойча Apple»нинг Redmi K30 Pro ҳамда Redmi K30 Pro Zoom Edition флагманлари энг зўр – Snapdragon 865 процессорли энг арзон телефонлардир. Xiaomi бу билан ҳам чекланиб қолмади – у аллақачон дунёдаги энг арзон 5G-смартфонни ҳам тайёрлади!
Хитойлик ишончли тармоқ информатори – Digital Chat Station қизиқ маълумотни тақдим этди. Яъни, шу кунларда «Осмон ости салтанати»да Redmi брендининг янги – M2002J9E модел рақамли смартфони сертификациядан ўтган. Манбанинг таъкидлашича, бу рақам остида Redmi Note 9 5G модели яширинган.
Яна шу манбанинг изоҳ беришича, компания ўз юртида Redmi K30 4G моделини савдодан олиб ташлаб, ўрнига мана шу 5G-смартфонни чиқаради. Redmi Note 9 5G эса атиги 140 дан 210 долларгача нархи билан умуман дунёдаги энг арзон 5G-смартфон бўлиши кутилмоқда.
ЎҚИНГ: Xiaomi нархи 285 доллардан ошувчи барча 4G-смартфонларини йўқ қилмоқчи!
Хабарингиз бор, компания аввалроқ Ҳиндистонда намойиш қилинган смартфони – Redmi Note 9 Pro моделини Вьетнамда Redmi Note 9S номи остида сотувга чиқарган. Шунингдек, ҳозирда кутилаётган Pocophone F2 (ёки Poco F2) ҳам аслида яқинда тақдим қилинган смартфон – Redmi K30 Pro моделининг Ҳиндистон бозори учун қайта номланган клони эканлиги аниқланган.
Лекин янги аниқланган Redmi Note 9 5G модели аввал чиққан бирортасининг қайта номланган версияси эмас, балки буткул оригинал смартфон бўлади. Бунга сабаб қилиб манбанинг кўрсатишича, унда 22 ваттлик тезкор қувватлаш технологияси жорий этилган. Redmi Note 9 Pro ҳамда Redmi Note 9 Pro Max моделлари эса тегишлича 18 ва 33 ваттлик технология асосида заряд олади.
Redmi Note 9 5G «электрон юраги» сифатида MediaTek Dimensity 800 5G процессори қўлланилиши тахмин қилинмоқда. Унинг тақдимот санаси ва бошқа хусусиятлари ҳозирча маълум эмас, бу борадаги янгиликларни Terabayt.uz билан бирга кузатишда давом этинг.
ЎҚИНГ: Тўртта моделдаги Xiaomi ва Redmi смартфонлари эгаларига нохуш хабар бор
