Redmi Note 9 ва Note 9 Pro’нинг асосий рақиблари намойиш қилинди – атиги 175 доллардан!
Oppo корпорацияси Redmi билан рақобатлашиш учун ташкил этган Realme суббренди ўзининг иккита янги смартфонини тақдим этди. Булар – Realme 6 ҳамда Realme 6 Pro моделлари бўлиб, Redmi Note 9 ҳамда Note 9 Pro смартфонларининг энг асосий рақиблари ҳисобланади.
ЎҚИНГ: Ҳали чиқмаган икки ҳамёнбоп – Redmi Note 9 Pro ва Realme 6 Pro флагманларининг илк жанги!
Realme 6 ва 6 Pro моделларининг нархлари тегишлича 175 ва 232 доллардан бошланади. Табиийки, Xiaomi корпорацияси ҳам «Йиртқич» эканини айтиб мақтаётган ушбу смартфонларини энди тахминан шунақа баҳолайди.
Аввалроқ хабар берганимиздек, компания офлайн тақдимот тадбиридан воз кечиб, онлайн намойиш қилиб қўяверди. Бу икки смартфоннинг хусусиятлари ҳақидаги суҳбатимизни стандарт Realme 6 моделидан бошлаймиз. Бу – ҳозирда экран янгиланиш частотаси 90 герц бўлган энг арзон смартфондир. Унинг диагоналига 6,5 дюймлик дисплейи Full HD+ форматида, ишлаб чиқарувчи унинг қанақа панел эканини айтмагн, тахминларга кўра – IPS бўлса керак. Смартфоннинг дактилоскопик датчиги экранга эмас, балки корпуснинг ён қиррасига жойлагани ҳам шунга ишора қилаётир.
Realme 6 модели MediaTek Helio G90T процессорига эга бўлиб, 175 долларлик смартфон учун бу жуда яхши ечим. Унга LPDDR4x туридаги, 4 – 8 ГБлик тезкор хотира шерикчилик қилади; UFS 2.1 стандартидаги ички хотира ҳажми эса 64 – 128 гигабайтлик. Смартфоннинг аккумулятори 4300 мА/соатлик; арзон модел бўлса-да, унга 30 ваттлик тезкор қувватлаш технологияси татбиқ этилган.
Янги смартфоннинг бош камераси тўртта модулни ўз ичига олади, бироқ улардан фақат иккитасини амалда фойдали, дейиш мумкин. Булар – 64 мегапикселлик Samsung GW1 сенсори ҳамда 8 мегапикселлик кенг бурчакли датчикдир. Қолган иккитаси – 2 мегапикселлик макро-камера ҳамда портрет режимида орқа фонни хиралаштирувчи оқ-қора камерадир. Дисплейнинг юқори чап бурчагидаги тирқишга жойланган селфи-камера датчиги эса 16 мегапикселлик аниқликда.
Иккита SIM-карта ва алоҳида MicroSD картасини жойлаш мумкин бўлган уяча, шунингдек, қулоқчин тирқиши ҳам мавжудлигини таъкидлаб ўтсак арзийди. Смартфон энг сўнгги – Android 10 операцион тизим талқини асосидаги Realme UI график қобиғи билан тақдим этилган. Корпусининг ўлчамлари 162,1х74,8х9,6 миллиметрни, вазни эса 191 граммни ташкил этади. Realme уни садафранг ва кўк тусли корпусларда чиқаради.
ЎҚИНГ: OPPO рекордчи селфифон – Reno 3 Pro ҳамёнбоп флагманини намойиш қилди
Энди Realme 6 Pro версиясига ўтадиган бўлсак, у ўзининг «ини»сидан муҳим жиҳатларига кўра фарқланади. Иккаласининг умумий жиҳатларини қолдириб, Pro-версиянинг фарқли жиҳатларини санаб ўтамиз.
Аввало, унинг корпуси йирикроқ – 163,8х75,8х8,9 миллиметр ва 202 грамм. Шунга яраша экрани ҳам диагоналига 6,6 дюймлик; аммо унинг тасвир аниқлиги ва бошқа жиҳатлари Realme 6’нинг дисплейидаги билан бир хил.
Realme 6 Pro’нинг асосий ўзига хослиги – 8 ядроли Snapdragon 720G процессоридир. Мазкур чипсет ўйинбоп смартфонларга мўлжалланган бўлиб, Elite Gaming функциясига эга. Смартфон 6–8 ГБлик тезкор ва 64–128 ГБлик доимий хотирага эга, яна 256 ГБликкача бўлган microSD-карта жойлаш мумкин.
Pro-версиянинг аккумулятори ток сиғими ҳам, зарядлаш технологияси ҳам стандарт модел билан бир хил. Бош камерада битта фарқи бор: Realme 6 Pro’да оқ-қора модул ўрнига телеобъективли 12 мегапикселлик сенсор қўлланган. Шунинг эвазига унда 20 карра зум жорий этилган.
Realme 6 Pro олд камераси қўшалоқ бўлиб, стандарт моделидаги ёнига 8 мегапикселлик иккинчи датчик қўшилган. Бу смартфон кўк ва зарғалдоқ корпусларда таклиф этилади.
Энг асосийси – нархлари масаласига келсак, Realme 6 модели 11 мартда сотувга чиқади ва тезкор/ички хотираси конфигурациясига кўра қуйидаги нархларда сотилади:
4/64 гигабайтлик Realme 6 – $175
6/128 гигабайтлик Realme 6 – $204
8/128 гигабайтлик Realme 6 – $218
Realme 6 Pro модели эса бозорга 13 март куни тақдим этилади ва 232 доллардан бошланувчи нархларда сотилади. Афсуски, компания унинг турли конфигурациялари нархларини аниқ айтмаяпти. Шунингдек, ҳар иккала модел ҳам фақат Ҳиндистон бозорига чиқарилади, бошқа мамлакатларда расман сотилиши ҳақида ҳозирча гап-сўз йўқ.
