Ucell абонентларига хушхабар: энди беш ойгача рақамингиз ўчмайди!

«COSCOM» масъулияти чекланган жамияти (Ucell савдо белгиси) бугун – 6 март санасидан айрим тариф режаларидаги абонентлар учун хизмат кўрсатиш шартларига ўзгартириш киритган. Бу ҳақда уяли алоқа оператори ўз сайти орқали хабар берган.

ЎҚИНГ: Барча операторларнинг энг арзон ва энг қиммат тарифларини таққослаймиз!

Хабарга кўра, 2020 йил 6 мартдан бошлаб, «COSCOM» МЧЖ тармоғида ҳақи олдиндан тўланадиган (Prepaid) хизмат кўрсатиш тизими уяли радиотелефон алоқаси хизматларини тақдим этиш шартномаси бекор қилингунига қадар Блокланган ҳолатда қолишнинг максимал муддати 150 кунгача узайтирилмоқда. Кирувчи қўнғироқлардан блокланган ҳолатга ўтган кундан бошлаб 80 кун давомида фойдаланиш мумкин бўлади.

Яъни, абонентлар фойдасига иккита ўзгариш бўляпти:

1. Телефон рақамингиз ҳисобидаги маблағ буткул тугаганидан кейин ҳам сиз яна 80 кунгача кирувчи қўнғироқларни қабул қила оласиз! Шу кунгача бу муддат 30 кунни ташкил этар эди.
2. Аввалги ҳолатда, рақамингиз ҳисобидаги маблағ тугаганидан кейин 90 кун ўтгач, рақамингиз бекор қилиниб, номингиздан ўчирилар эди. Энди эса мазкур муддат 150 кунга узайтирилган – деярли беш ойлик муддат тугагунича ҳисобингизни тўлдириб, яна рақамингизни ишлатишда давом этаверишингиз мумкин!

ЎҚИНГ: ТЕЗКОР ХАБАР: Ucell Ўзбекистонда илк 5G тармоғини ҳамда метрода уяли алоқани ишга туширяпти!

Таъкидланишича, мазкур ўзгаришлар 2020 йил 6 март ҳолатига мувофиқ 30 кундан ортиқ бўлмаган муддат давомида блокланган ҳолатда бўлган абонентларга, шунингдек, «Рақамни сақлаб қолиш» хизматини (6 ойга ёки 12 ойга) фаоллаштирган абонентларга татбиқ этилади.

Хабарга кўра, ўзгаришлар қуйидаги тариф режаларида амал қилади:

Active 45, Active 70, Active 100, BEST, Yaxshi kayfiyat, Zo‘r kayfiyat, A’lo kayfiyat, Superkayfiyat, Azizlarim, Drive, Yengil hafta, Baxtli 25, Baxtli 25+, Diyorim, Tantana, Katta tantana, Super Tantana, Marhamat, Ko‘proq!, Yangi ijobiy, Ijobiy, Oddiy, Special, Special 125, Special 125+, Special 35, Special 35+, Special 55, Special 55+, Special 80, Special 80+, Special MB, Special MINI, Special MIX, Special SUPER, Special Unlim, Special X, Student, Minnatdormiz!.

Компаниянинг қолган хизмат кўрсатиш шартлари ўзгаришларсиз қолади, дейилади хабарда.

ЎҚИНГ: Оператор билан тезкор боғланиш сирларини биласизми?