Xiaomi яна Гиннесснинг рекордлар китобида: бу гал у қандай «каромат» кўрсатди?
Ишлаб чиқарувчилар нафақат ўз маҳсулотлари, балки антиқа тадбирлари билан ҳам рекорд ўрнатишга қизиқишади. Масалан, Xiaomi ўтган йили Mi Play смартфонларининг нақ 1005 тасидан анимацияли мозаика яратиб, Гиннесснинг рекордлар китобига кирган эди.
ЎҚИНГ: Бу актриса аккаунт очибоқ Instagram’ни ишдан чиқарди ва ҳатто Гиннеснинг рекордлар китобига кирди!
«Хитойча Apple» куни кеча Гиннесснинг китобига киритилган навбатдаги рекордини эълон қилди. Хабарга кўра, компания ташкил этган қадоқларни очиш тадбирида энг кўп – 703 киши иштирок этган.
Айтиш керакки, бу ерда айнан смартфонлар қутиси ҳақида гап кетмаяпти, балки Xiaomi ўз фанатларига аталган турли совғаларни қутиларга солиб тарқатган ва уларга тасодифий ҳадялар тушган. Суратга қараганда, кишилар ўзларига берилган қадоқларни осмонга шундай отишлари керак бўлганки, уларнинг ичидаги номаълум совға отилиб чиқиши керак бўлган.
«Mi-stery Box» деб номланган ушбу тадбир Нью-Йорк марказида бўлиб ўтган. Xiaomi шу йўл билан Гиннесс рекордлар китобига киришдан ташқари, АҚШ бозорида ўзига эътибор жалб этишни ҳам кўзлаган. Мазкур корпорация бу бозорга нисбатан яқинда кириб келган, аммо фақат электрик самокат ва проектор каби маҳсулотларни сотмоқда. Бизда жуда оммабоп бўлган Xiaomi смартфонлари эса АҚШда ҳозирча сотилмаяпти.
ЎҚИНГ: Фойдаланувчилар фикри: Xiaomi смартфонларининг асосий афзаллиги нимада?
