Android Q Beta 4 to‘xtatildi – u smartfonlarni butkul ishdan chiqaryapti!
Google kompaniyasi kuni kecha o‘ninchi avlod operatsion tizimining yangi beta-versiyasi – Android Q Beta 4 talqinini chiqargan edi. Terabayt.uz esa mazkur yangilanishni yuklab olish mumkin bo‘lgan smartfon modellarining ro‘yxatini e’lon qilgan.
Biroq ushbu apdeytni o‘z smartfonlariga o‘rnatib olgan ko‘plab foydalanuvchilardan shikoyatlar tusha boshladi. Norozilik murojaatlari asosan turli modellardagi Pixel qurilmalari egalaridan kelgan.
Gap shundaki, Android Q Beta 4 talqiniga yangilangach, qurilmalar so‘ngsiz o‘chib-yonish jarayoniga tushib qolgan. Ayrim smartfon egalari o‘z gadjetlarini majburiy tarzda boshlang‘ich sozlamalariga qaytarish yo‘li bilan bu muammodan qutulishgan. Biroq bunda devaysning xotirasidagi barcha ma’lumotlar – kontaktlar, suratu videolar va boshqa fayllar yo‘q bo‘lib ketishi chatoq-da.
Google foydalanuvchilarning shikoyatlari sababli tezda chora ko‘rdi – Android Q Beta 4 yangilanishini to‘xtatib qo‘ydi. Endi kompaniya dasturchilari mazkur muammoning sababini topish va bartaraf etish ustida ishlashmoqda. Barchasi hal etilgach, o‘ninchi Android’ning to‘rtinchi beta-versiyasi yana tarqatilishi kutilmoqda.
O‘QING: Android 10 Q sizni muhim bir imkoniyatdan mahrum etadi!