JONLI VIDEO: MIUI 10 tizimli Redmi 6 Pro’ni taqdimotdan avval qadog‘idan olib, ishlatib ko‘ramiz!
Xiaomi kompaniyasi Redmi 6 Pro rusumli hamyonbop smartfonini 25 iyunda rasman namoyish etmoqchi ekanidan xabaringiz bor. Allaqachon uning texnik xususiyatlari hamda rasmiy suratlarini ham e’lon qilganmiz.
O‘QING: 150 dollarlik Redmi 6 Pro smartfonini sifatli rasmiy suratlarda ko‘ramiz!
Ammo taqdimotni ham kutib o‘tirmasdan, hoziroq ushbu smartfonni to‘laqonli tomosha qilish imkoni tug‘ildi. Ya’ni, allaqachon insayderlar Xiaomi Redmi 6 Pro modelini qadog‘idan olib, ishlatib ko‘rsatilgan videoni internetga joylashdi.
Keling, uni birga ko‘rib chiqamiz:
E’tibor bergandirsiz – yangi smartfon boshidanoq MIUI 10 proshivkasida ishlayapti. Hozircha Xiaomi’ning boshqa modellardagi smartfonlariga mazkur talqin taqdim etilmagan, faqat ayrim rusumlardagi smartfonlar egalari sinov doirasidagina uni ishlatib ko‘rishlari mumkin.
Yuqoridagi videorolikda o‘zingiz ham guvoh bo‘lganingizdek, Redmi 6 Pro jamlanmasida biror g‘ayrioddiy yoki kutilmagan narsa yo‘q. Qadoq ichida smartfonning o‘zidan tashqari microUSB kabeli, SIM-kartalar va xotira kartasi bo‘lmachasini ochish ignasi, quvvatlash blogi (aftidan, 5V-2A quvvatli) hamda oddiy silikon g‘ilof, shuningdek, foydalanuvchi yo‘riqnomasi bo‘ladi.
Ko‘rganimiz lavhada Lake Blue rangli smartfon namoyish etilgan, rasmiy renderlarga qaraganda, u yana Flame Red, Black, Rose Gold va Sand Gold ranglardagi korpuslarda chiqariladi.
Darvoqe, Redmi 6 Pro smartfoni bilan birga Xiaomi’ning yana bitta innovatsion qurilmasi ham taqdim etiladi. Bu – Mi Pad 4 rusumli, foydalanuvchi qiyofasini to‘laqonli skanerlovchi birinchi planshetdir.