Photoshop ham kerak emas: Remove.bg – orqa fonni bir necha soniyada tozalovchi bepul servis!
Product Hunt asoschisi Rayan Guver o‘zining Twitter-akkauntida Remove.bg servisiga e’tibor qaratgan. Mazkur sayt ayrim o‘rinlarda Adobe Photoshop o‘rnini bosa oladi.
O‘QING: PSD-fayllarni Photoshop’siz ham ochadigan 5 dastur
Remove.bg onlayn servisining asosiy vazifasi – fotosuratlarda orqa fonni olib tashlashdir. Qulayligi shundaki, bunda siz rasmda biror hududni belgilab o‘tirishingiz shart emas – servisning o‘zi barchasini avtomatik tarzda bajaradi.
Remove.bg saytida orqa fonni belgilab, olib tashlash uchun «sun’iy ong» texnologiyalaridan foydalaniladi. Qo‘shimcha algoritmlar esa mayda detallarning aniqligini yaxshilab beradi.
Servisdan foydalanish uchun uning saytiga mana bu havola orqali o‘tib, kerakli rasmni yuklash yoki internetdagi suratning URL-manzilini kiritish kifoya. Bir necha soniyadan so‘ng tahrirlangan tasvirni *.png formatida qabul olasiz.
To‘g‘ri, Remove.bg tizimi hozircha faqat portretlarnigina tahrirlay oladi – uning «sun’iy idrok»i odamning siluetini avtomatik aniqlashga qodir. Lekin kelajakda bu texnologiyani rivojlantirishni va’da qilishyapti.
O‘QING: Android’da suratni qayta ishlovchi eng zo‘r ilovalar