Windows’da ishlashni osonlashtiruvchi 12 ta tugmachalar kombinatsiyasi

Ko‘pchilik qatori, siz ham kompyuterda asosiy amallarni sichqoncha yordamida bajarishga ko‘nikib qolgansiz-a? Lekin asosiy ishlarni klaviatura yordamida – tugmachalar birikmasi bilan qilish ancha qulay.

O‘QING: Windows’ning ko‘pchilik bilmaydigan uchta qulay funksiyasi

Ayniqsa, Windows 10 tizimida tugmachalar birikmasi sizning ishlash samaradorligingizni oshiradi, vaqtingizni tejaydi. Yana bir jihati – tachpad va sichqoncha bo‘lmasa yoki ular ishlamay qolganida, shu usul juda qo‘l keladi.

Quyida oynalar bilan tezkor ishlashga xizmat qiluvchi 12 ta tugmachalar kombinatsiyasini keltirib o‘tamiz.

1. Alt + Tab. Bunda Alt tugmachasini bosib ushlab turgan holda, keyin Tab’ni bosasiz. Paydo bo‘lgan panelda barcha ochiq turgan dasturlar oynalari prevyu shaklida ko‘rinadi. Tab’ni qayta-qayta bosish orqali istalgan birining ustiga borib qo‘yib yuborsangiz, o‘sha oynaga o‘tasiz.
2. Ctrl + Alt + Tab. Yuqoridagi usulda siz Alt’ni qo‘yib yuborishingiz bilan oynalar prevyusi avtomatik tarzda g‘oyib bo‘ladi. Lekin mana bu tarzda – uchta tugmacha birikmasi bilan uni yo‘qolib qolmaydigan qilish mumkin. Oynalarni bemalol ko‘rasiz, ko‘rsatkich (strelka) tugmachalari bilan keraklisining ustiga borasiz va Enter’ni bosasiz – shunda panel yo‘qolib, o‘sha dasturga kirasiz.

3. Win + Tab. Bu kombinatsiya «Vaqt shkalasi»ni ekranga chiqaradi: unda siz yaqin orada ochgan barcha dastur va hujjatlar oynalari aks etadi. Shu yerning o‘zida, yuqori chap burchakdagi tugmacha yordamida yangi ish stoli ochishingiz, dasturlarni ularda saralab joylashingiz mumkin. Oynani sichqoncha bilan ham, ko‘rsatkich tugmachalari va Enter bilan ham tanlash mumkin.

4. Win + ↓. Ochiq turgan oynani pastga yig‘ib qo‘yadi. Agar oyna ekranning chekkalariga yoyib qo‘yilgan bo‘lsa, bu tugmachalar birikmasi dastlab uni chorak qismigacha kichraytiradi. Ikkinchi marta bosganingizda esa oyna to‘liq yig‘iladi.
5. Win + ↑. Joriy oynani ochadi. Agarda oyna ekran chekkalarigacha yoyilgan bo‘lsa, dastlab chorak qismi kattaligida ochiladi, ikkinchi marta bosganingizda to‘liq yoyiladi.
6. Win + Shift + ↑. Joriy oynaning enini o‘zgartirmasdan, faqat balandligi bo‘yicha to‘liq kengaytiradi.

O‘QING: Windows 10’da istalgan shaklda skrinshot olishning uchta oson usuli

7. Win + ← yoki →. Ochiq oynani ekranning tegishlicha chap yoki o‘ng chekkasigacha qadaydi.
8. Alt + Probel. Joriy dasturning menyusini ochadi. Uning yordamida oynani nafaqat yig‘ish yoki yopish, balki sichqonchasiz ham o‘lchamini o‘zgartirish va ekran bo‘ylab surish ham mumkin. Alt + Probel kombinatsiyasidan so‘ng ko‘rsatkich tugmachalari yordamida «Peremestit»ni tanlang, Enter’ni bosing va oynani yana strelka tugmachalari bilan suring. Bu usul hattoki oyna ekran hududidan chiqib qolsa ham ishlayveradi.

9. Win + M. Ochilgan barcha oynalarni pastga yig‘adi.
10. Win + D. Ochilgan oynalarning barchasini, hattoki o‘zida «Svernut» tugmachasi bo‘lmasa ham yig‘ib qo‘yadi.
11. Win + Home. Joriy oynadan barchasini pastga yig‘ib qo‘yadi. E’tiboringizni faqat bitta ishga qaratish kerak bo‘lganida juda asqotadi.
12. Win + Shift + M. Barcha oynalarni yana yoyib qo‘yadi.

Shularni bir ishlatib ko‘rsangiz, oynalarni tugmachalar orqali boshqarish naqadar qulayligini o‘zingiz ham sezasiz. Keyin esa har gal qo‘lingiz bilan sichqonchani izlab, kursorni kerakli joyga olib borib, sichqoncha tugmachasini bosib yurish o‘rniga, barmoqlaringiz bilan shundoqqina ishlab turgan joyida ikkita yoki uchta tugmachani bosib ishni bitkazaverasiz.

O‘QING: Windows 10 o‘rnatgandan so‘ng qilish shart bo‘lgan 7 ish