Xiaomi eng arzon – Redmi Go smartfonini ro‘yxatdan o‘tkazdi!
«Xitoycha Apple» o‘zining Redmi turkumida hamyonbop smartfonlar taqdim etib kelmoqda. Arzon telefonlar bozorida raqobat kuchayib borayotgani uchun, u mazkur seriyada yanada arzon – Xiaomi Redmi Go modelini tayyorladi!
Nomidan ham ko‘rinib turganidek, Xiaomi’ning ushbu smartfoni hamyonbop modellarga mo‘ljallangan – «yengil» Android Go operatsion tizimi boshqaruvi ostida ishlaydi.
Xiaomi Redmi Go haqida dastlab anonim insayderlar Weibo tarmog‘i orqali xabar berishgandi, ammo o‘shanda ko‘pchilik buni feyk xabar, deb hisoblagan. Lekin kuni kecha Singapurning IMDA regulyatorida M1903C3GG raqami ostida ro‘yxatdan o‘tkazildi.
Ko‘rib turganingizdek, qurilmaning ishlab chiqaruvchisi sifatida Xiaomi, model nomi tarzida esa – Redmi Go ko‘rsatilgan. Demak, hamyonbopdan ham arzon smartfonning yaqin orada taqdim etilishiga shubha qolmadi!
Insayderlar sharofati bilan ushbu smartfonning ayrim texnik xususiyatlari ham ma’lum bo‘lgan. Ularga ko‘ra, Xiaomi Redmi Go arzon model bo‘lsa-da, yupqa romli 5,9 dyuymlik displeyga ega. Bu gadjet 1 yoki 2 gigabaytlik tezkor xotira hamda yakka modulli kamera bilan ta’minlanadi.
Modomiki yangi smartfon «taroshlangan» operatsion tizimda ishlar ekan, uning protsessori ham unchalik kuchli bo‘lmaydi. Shundan kelib chiqib, Xiaomi Redmi Go narxi ham 100 AQSh dollari atrofida bo‘lishini taxmin qilishmoqda.
Xiaomi Redmi Go kelasi yil bahorning boshlarida taqdim etilishi kutilmoqda, «Xitoycha Apple»ning hozirgacha jahon bozoriga chiqargan ayrim smartfonlarini esa 809 000 so‘mdan boshlanuvchi narxlarda sotib olish mumkin.