Экрани «тирқиш»ли Huawei Nova 4’нинг барча жиҳатлари тақдимотдан аввал «жонли» суратда фош этилди
Хитойлик техногигант «тешик» дисплейли смартфон намойиш этишда «бир қадам олдинда» эканини айтганида, барча Nova 4 моделини тушунганди. Мазкур гаджет тақдимоти 17 декабрга белгилангач, Samsung ўзининг Galaxy A8s девайсини ундан аввал – 10 декабрда тақдим этди. Бироқ айни шу куни, Huawei ўзининг бошқа бренди остидаги «тешик» экранли қурилмасини барибир биринчи бўлиб оммага кўрсатиб улгурди.
ЎҚИНГ: Honor View 20 намойиш этилди: 48 МПлик камера ва «тешик» экранли илк смартфон!
Энди эса Huawei брендига мансуб Nova 4 модели тақдимоти кутилаётир – у мазкур компаниянинг 48 МПлик камерага ва «тирқиш»ли экранга эга иккинчи смартфони бўлиши керак.
Бироқ Nova 4 у қадар кучли техник таъминотга эга эмаслиги кеча маълум бўлди. Weibo ижтимоий тармоғида ушбу смартфоннинг барча хусусиятлари кўрсатилган расм эълон қилинди. Афтидан, у компаниянинг бирор ёпиқ тадбирида катта экрандан «жонли» тарзда суратга олинган.
Бу ерда эътибор қаратиш керак бўлган энг асосий жиҳат – энг илғор Kirin 980 процессори эмас, балки Kirin 970 чипи қўлланаётганидир. Умуман олганда, буларнинг иккаласи ҳам смартфонларнинг етарлича самарадорлигини таъминлай олади, аммо Nova 4 моделини энди барибир флагман деб бўлмайди.
ЎҚИНГ: Ҳали тақдим этилмаган ҳамёнбоп Huawei P Smart (2019) камерофонини ҳар томонлама томоша қиламиз!
Иккинчи жиҳат айнан камерага тегишли: 48 мегапикселлик датчик Nova 4’нинг фақатгина энг илғор конфигурацияли вариантида қўлланаётгани маълум бўлди. Бошқа модификацияларининг бош камерасида эса 20 мегапикселлик асосий сенсор ишлатилади. Қолган иккита объектив эса барча модификацияларида бир хил – 16 ва 2 мегапикселлик. Шунингдек, селфи-камера ҳам Nova 4’нинг ҳамма вариантларида бир хил – 25 мегапикселлик сенсорга эга.
Юқоридаги расмда кўриб турганимиздек, ушбу қурилманинг «тешик» дисплейи диагоналига 6,4 дюймлик бўлиб, 2310х1080 пикселлик тасвир аниқлигига эга. смартфоннинг 3750 мА/соатлик аккумулятори эса 18 ваттлик ток билан тезкор қувватлана олади.
Эслатиб ўтамиз, Nova 4’нинг расмий тақдимоти 17 декабрда бўлиб ўтади, унинг қачон бозорга чиқиши ва Ўзбекистонга етиб келиши ҳозирча номаълум. Huawei’нинг аксарият смартфонларини эса 890 000 сўмдан бошланувчи нархларда Terashop.uz интернет-дўконимиздан харид қилиш мумкин.
