Apple сайтида iPhone X'нинг 6 муҳим жиҳати эълон қилинди
Apple компанияси ўзининг интернет тармоғидаги саҳифасида iPhone X флагманига аввалдан буюртма бериш санаси ва сотувга чиқиш вақтини эълон қилди. Унга кўра 27 октябрдан, Тошкент вақти билан 12:00 дан бошлаб смартфонга буюртма бериш ва 3 ноябрдан жаҳоннинг 55 мамлакатида бу смартфонни харид қилиш мумкин. Apple савдонинг илк босқичида iPhone X билан боғлиқ танқислик юзага келишини маълум қилган.
Биз эса қуйида Apple.com сайтида iPhone X'га оид тақдим этилган промо-маълумотларни тақдим қиламиз. Ундан флагманга оид 6 жиҳат эълон қилинган.
— Дизайн ва экран. Олд панелни тўлиқ эгаллаб олган 5,8 дюймли экран. Бу -- ҳам орқа, ҳам олд панел пишиқ шиша билан қопланган компания тарихидаги панеллари энг чидамли смартфон.
— Face ID. Сизнинг қиёфангиз — сизнинг паролингиз. Тизимга киришнинг янги усулини тақдим қиламиз ва унинг ёрдамида сиз смартфонга биргина қараш орқали уни блокировкадан чиқарасиз.
— TrueDepth. Бу кичкинагина майдондан жуда кўп имкониятлар ўрин олган. Шулардан бири TrueDepth камераси бўлиб, у FaceID технологияси, "Портрет режим"ида суратга олиш, "Портрет ёруғлиги" ва "Аниможи" каби замонавий функцияларга хизмат қилади.
— Тўлиқ янгиланган камера технологияси. Оптик барқарорлаштириш ва студия сифатида суратга олувчи янгича "Портрет режими", 12 мегапикселли қўш сенсорлар ҳар бир кадрни энг мақбул усулда қайта ишлайди.
— A11 Bionic процессори. Смартфонларда илк маротаба татбиқ қилинган ва секундига 600 миллиард операцияни бажарадиган нейронли тармоқ ўтказгичларига эга энг кучли ва ақлли чип.
— Симсиз қувватлаш. Флагманни шунчаки қўйинг ва у ўзи қувват олади. iPhone X симсиз технология олами учун яратилган.