Дастурчи тасодифан Соғлиқни сақлаш вазирлиги ва ҳокимият сайтларига хакерлик ҳужумини уюштирди!
Новосибирск касалхоналаридан бирининг ходими бўлган дастурчи ушбу муассасанинг сайти қанчалик ҳимояланганлигини текшириб кўришга қарор қилди. Унинг мақсади – сайт муҳофазасидаги «тирқиш»ларни бартараф этиш эди, холос, аммо...
ЎҚИНГ: Қўлга олинган хакер университетнинг... қоровули бўлиб чиқди!
Хулласи калом, шифохона сайтининг ҳимоясидаги заифликларни аниқлаш учун у Netsparker, XSpider, Retina, Netcracker каби бир нечта сканер-дастурни қўллаган. Дастурчи шунчаки текшириб кўрмоқчи бўлган, аммо бу утилиталар касалхона сайти муҳофазасини «ёриб» кирган. Бугина эмас – дастурлар шу сайт билан боғланган Соғлиқни сақлаш вазирлигининг маълумотлар базасига ҳам ҳужумга ўтишган. Сўнг эса у билан боғланган маҳаллий ҳокимият сайтини ишдан чиқаришган.
Табиийки, хакерлик ҳужумининг манбаси тезда аниқланган ва дастурчи ушланган. Гарчи атайлаб қилмаган бўлса-да, энди уни Россия Федерацияси Жиноят кодексининг 273-моддаси – «зиёнкор компьютер дастурларини қўллаш ва тарқатиш» бўйича айблашган. Суд қарорига кўра унга 30 минг рубль миқдорида жарима солишди ва интизомий чора кўришди.
Шуниси борки, дастурлашни билган ҳар қандай киши, лоақал бир марта бўлса-да, хакерликка ҳам қизиқиб кўради. Яна бир жиҳатини тўғри тушуниш муҳим: ғаразли мақсадларни кўзда тутмайдиган «оқ хакерлик» тушунчаси ҳам мавжуд, уни ўрганиш учун 6 та энг яхши ресурс ҳамда бешта китоб ҳақида мақолалар чиқарганмиз.
ЎҚИНГ: Самарқандда 60 яшар кибер жиноятчига ҳукм ўқилди (+видео)
