iPhone’лар учун Telegram’да энди чатларни тоифаларга саралаш мумкин! (+видео)
Яқиндагина macOS тизими учун ишлаб чиқилган Telegram’нинг барқарор версиясига чатларни тоифалар бўйича саралаш имкони қўшилган эди. Энди эса мессенжернинг iOS-клиентида ҳам шунга ўхшаш функция жорий этилди, аммо ҳозирча фақат бета-талқинида.
Айфонларга мўлжалланган Telegram’нинг янги бета-жамланмасида каналлар ва ёзишмаларни мавзуларга кўра саралаш мумкин. Танланган каналларнинг постлари ва контактларнинг хабарлари варақаларда акс эттирилади. Варақаларнинг биридан иккинчисига ўтиш учун эса экранни чапга ёки ўнгга силаш кифоя.
Чатларни маълум бир турларига кўра (битта контакт билан ёзишмалар, гуруҳлар, каналлар ёки ботлар) жилдларга автоматик ажратиш, шунингдек, кераклиларини уларга қўлда қўшиш мумкин. Кастом фильтрлар фойдаланувчининг хоҳишига кўра архивдаги, овозсиз, ўқилган ёки бошқа исталган чатларни жилддан чиқариш имконини беради. Умуман, битта папкага саралашнинг бир нечта шартларини жорий этиш мумкин.
Жилдларни созлаш ёки янгисини яратиш учун «Чаты» белгичасини босиб, токи контекст меню чиққунича ушлаб туриш керак. Унда сиз мавжуд папкаларни кўрасиз; янги жилдни қўшиш ҳам шу ернинг ўзидан амалга оширилади.
Ушбу қулай функциялар Telegram’нинг барқарор версиясига, шунингдек, бошқа платформалардаги иловаларига қачон қўшилиши номаълум. Мессенжернинг айрим муқобил норасмий иловаларида (масалан – Plus Messenger’да) эса чатларни тоифаларга ажратиб кўрсатиш функцияси аввалдан бор.
ЎҚИНГ: Telegram-профилга QR-код орқали тезкор кириш (+видео)
