«ЖОНЛИ» ВИДЕО: Ҳали намойиш қилинмаган Xiaomi Mi Play’ни илк бор фокусда кўрамиз!
Xiaomi компанияси ёшларбоп Mi Play (ёки Xiaomi Play) смартфонини тайёрлаётгани ҳақида хабар берганмиз. 24 декабрда расман намойиш этиладиган бу қурилманинг расмий суратлари ҳам эълон қилинган.
ЎҚИНГ: Кейинги ҳафтадаёқ тақдим этилаётган ёшларбоп Xiaomi Play смартфонини расмий суратларда кўрамиз!
Энди эса Xiaomi ҳали тақдимотидан ҳам аввал Weibo ижтимоий тармоғида ушбу смартфонининг видеосини ўзи тарқатди – бунақаси кам учрайди! Видео бўлгандаям унча-мунча тизер эмас, балки шу Mi Play ижросида фокус кўрсатишган!
Мана, ўзингиз томоша қилинг-да:
Хўш, сиз фокус сирини топа олдингизми?
Xiaomi ушбу моделини 24 декабрда тақдим этади, компания ундан нақ мингтасини бир вақтнинг ўзида қадоғидан олиш билан Гиннеснинг Рекордлар китобига кирмоқчи. Аввалроқ OnePlus шундай йўл билан рекорд ўрнатган эди.
ЎҚИНГ: Xiaomi энг арзон – Redmi Go смартфонини рўйхатдан ўтказди!
Айтиш керакки, Xiaomi Mi Play аллақачон TENAA’да сертификациядан ўтган ва унинг асосий техник хусусиятлари маълум. Смартфонда ҳозирча номаълум бўлган саккиз ядроли процессор қўлланяпти, унинг максимал такт частотаси 2.3 гигагерцга тенг. Версиясига боғлиқ ҳолда Mi Play тезкор хотираси 3/4/6 ГБ, доимий хотираси эса – 32/64/128 гигабайт ҳажмга эга. Қурилманинг «қувват тоши» бўлса – 2900 мА/соатлик сиғимга эга аккумулятор.
Диагоналига 5.84 дюймлик экраннинг томонлари ўзаро 19:9 нисбатда. Тасвир аниқлиги Full HD+ форматида бўлган дисплейининг тепа қисмида томчисимон «ўйиқ» бор – унда 8 мегапикселлик камера датчиги жойлашган.
Xiaomi Mi Play корпусининг орқа қопқоғи шишадан ёки жилодор пластикдан ишланган, унинг градиент тусли вариантлари ҳам бўлади.
ЎҚИНГ: Xiaomi’нинг энг оммабоп смартфонини янги прошивка ишдан чиқармоқда
Юқори чап бурчакка қўндирилган бош камера қўшалоқ бўлиб, унинг асосий сенсори 12 мегапикселлик. Шунингдек, бармоқ изи сканери ҳам орқа панелга ўрнатилган.
Ёшларбоп Mi Play фақатгина ўз ватанида сотилиши эҳтимоли юқори – бошқа мамлакатларда уни расман сотишмаса керак. Xiaomi жаҳон бозорига чиқарган турли смартфонларини эса 809 000 сўмдан бошланувчи нархларда сотиб олиш мумкин.
