205 dollarlik Redmi Note 7 Pro fevraldan sotuvga chiqadi!
Xiaomi kompaniyasi o‘tgan haftada Redmi Note 7 smartfonini rasman taqdim etib, 15 yanvardan uning savdosini ham boshlagan. Terabayt.uz saytida ushbu smartfonning turli sinovlari aks etgan videolavhalar, suratlar va boshqa ma’lumotlar e’lon qilingan.
Endi esa «xitoycha Apple» ushbu smartfonning yanada takomillashtirilgan versiyasi – Redmi Note 7 Pro modelini ham tayyorlaganini ma’lum qildi. Insayderlar bergan yangi ma’lumotlar esa uning turli xususiyatlariga aniqlik kiritgan.
Jumladan, Redmi Note 7 Pro smartfoni Qualcomm kompaniyasining o‘rtacha smartfonlarga mo‘ljallangan yangi chipi – Snapdragon 675 bazasidagi ilk devayslardan biri bo‘ladi. Smartfonning tezkor xotirasi 6 gigabaytgacha, ichki xotirasi esa 128 gigabaytgacha talqinlarda bo‘ladi.
O‘QING: «JONLI» VIDEO: Xiaomi displeyning hamma joyi skanerli smartfon tayyorladi!
Quyidagi surat Xiaomi’ning yopiq taqdimotidan olingan, deyishmoqda:
Redmi Note 7 Pro ham xuddi Redmi Note 7 singari 48 megapiksellik qo‘sh kamera bilan jihozlanadi, ammo yangi modelda Samsung GM1 emas, balki Sony IMX586 optik sensori qo‘llanadi.
Xitoylik insayderlarning Weibo tarmog‘i orqali ma’lum qilishlaricha, Redmi Note 7 Pro shu yilning fevralidanoq sotuvga chiqariladi. Uning tezkor/doimiy xotirasi 4/64 gigabaytlik versiyasi 205 dollarga, 6/128 gigabaytligi esa 220 dollarga baholanishi kutilmoqda.
O‘QING: Navbatdagi Xiaomi flagmanining taqdimot sanasi e’lon qilindi
