Барча смартфонлар учун Forza Street чиқди, лекин Samsung’чиларга алоҳида имтиёзлар бор! (+видео)
Microsoft бундан бир йил аввал Forza Street пойга симуляторини компьютерлар учун чиқарган эди. Компания шартли бепул бўлган ушбу ўйинини бугун – 5 май санасидан мобил қурилмалар учун ҳам тақдим этди.
ЎҚИНГ: Ubisoft’дан учта саргузашт ўйинни 5 майгача бепул олиб қўйишга улгуринг! (+видеолар)
Forza Street’нинг мобил версияси шу йилнинг февралида, эксклюзив тарзда фақатгина янги тақдим этилган Galaxy S20 флагманларига чиқарилган эди. Энди эса уни исталган Android тизимли смартфон ва планшетга ушбу ҳавола, айфон ҳамда айпадларга эса мана бу ҳавола орқали ўрнатиб олиш мумкин.
Бу – коронавирус туфайли карантин шароитида уйдан чиқмасдан пойга ўйнаш учун зўр имконият. Дастлабки 30 кун мобайнида – 5 июнгача рўйхатдан ўтган барча иштирокчиларга бонус сифатида пойга симулятори ичида 2017 Ford GT автомобили берилиши алоҳида эътиборга лойиқ.
Гарчи ўйинни юклаб олиш имкони барча мобил геймерларга тақдим этилган бўлса-да, Microsoft барибир Samsung қурилмалари эгалари учун устунлик берган. Яъни, Samsung Galaxy смартфонлари ва планшетлари учун Forza Street’да эксклюзив контент кўзда тутилган.
Жанубий кореялик гигантнинг барча мобил қурилмалари эгалари афзалликларга эга бўлиш учун ўйинни Google Play эмас, балки мана бу ҳавола орқали Galaxy Store каталогидан ўрнатиб олиш керак. Шунда уларга бепул Ford Mustang GT автомобили берилади, Galaxy S20 эгаларига эса яна бепул Corvette C6 ҳам тақдим этилади.
ЎҚИНГ: Samsung ҳали тақдим этилмаган, «яширин камера»ли Galaxy Note 20’ни энди «жонли» видеода кўрсатди!
