Apple ҳамма ёғи фақат дисплейдан иборат iPhone патентлади!
Xiaomi компанияси бултур намойиш этган ишқилобий Mi Mix Alpha смартфонининг атрофини дисплейи деярли бутунлай қоплаган. Apple ҳам унга эргашиб, корпусининг ҳар икки томони дисплейли айфон тайёрлаётгани ҳақида ёзган эдик.
ЎҚИНГ: Энди Apple’нинг ўзини ўғирликда айблашмоқда!
Купертинолик корпорациянинг янги патент ҳужжатлари интернетга чиқиб кетди. Унда ўтган галгисидан ҳам антиқа – корпуси ҳар томонлама шишадан ишланган смартфон тасвирланган.
Кўринишидан у бир парча шишага ҳам ўхшаб кетади, лекин аслида бу гаджет бир нечта қисмларнинг бирлашмаси бўлиши ҳам мумкин.
ЎҚИНГ: Apple келаси йил беш хил янги айфон, сўнг эса «металл совун» ва iPhone SE 2 Plus тақдим этади!
Патент ҳужжатларидаги расмларга қараганда, ушбу iPhone’да на бирор тугмача, на бирор порт кўзга ташланмайди. Унинг корпуси яхлит экрандан иборат – ҳам олд ва орқа панелларни, ҳам ён қирраларни шу дисплей қоплаб олган. Apple бундай қурилма учун ўз операцион тизимининг янгича версиясини ҳам тайёрлаяпти.
«Асосий интерфейс гаджетнинг олд юзасига чиқарилади, лекин шу билан бирга ён қирралар ва орқа томони ҳам қўлланаиши мумкин. Шунинг эвазига фойдаланувчи экрандаги белгичаларни ёнга суриб варақлаганида, улар қўшни юзаларга ўтиб кетади. Интерфейснинг ўзи қурилманинг атрофини ҳалқадек ўраб олиб, ёпиқ айлана ҳосил қилади», – дейилади патент ҳужжатларида.
ЎҚИНГ: 2020 йилнинг биринчи ярмидаёқ Apple чиқарадиган 6 гаджет
Смартфоннинг олд ва орқа панеллари бўлмагани учун, фойдаланувчи уни қайси томонидан ушлаб турганини гаджет ўзи аниқлайди ва керакли юзага бош саҳифани чиқаради.
Бироқ мазкур iPhone’нинг қачон тақдим этилиши ҳақида гап-сўз йўқ; эҳтимол, у амалга оширилмаган лойиҳа сифатида, шунчаки патент ҳужжатларида қолиб ҳам кетар.
ЎҚИНГ: Apple расмий сайтида ҳали тақдим этилмаган, кемтиксиз iPhone «қўлга тушди»!
