Dimensity 1000 процессорли илк 5G-смартфон – Oppo Reno 3 тақдим этилди
MediaTek компанияси 5G тармоқларини қўлловчи, 7 нанометрлик тех-жараёнга асосланган Dimensity 1000 чипсетини тақдим қилган эди. AnTuTu бенчмаркининг эталон тестида у Snapdragon 855+ ва ҳаттоки Apple A13 Bionic процессорларини ҳам енгиб, рекорд натижа кўрсатган.
ЎҚИНГ: Биринчи «ўлдириб бўлмас» 5G-смартфон энг кучли процессорга ҳам эга!
Бугун – 26 декабрда эса MediaTek Dimensity 1000 платформали биринчи смартфон – Oppo Reno 3 намойиш этилди. Аксарият янги қурилмаларнинг расмий тақдимотидан то бозорга чиққунича бир неча ҳафта ёки ҳатто ойлаб вақт ўтадиган бўлса, Oppo бундай қилмаяпти. Reno 3 смартфонини шу йилнинг сўнгги куни – 31 декабрь санасиданоқ харид қилиш мумкин бўлади.
MediaTek Dimensity 1000 чипсети (Oppo Reno 3 моделида унинг Dimensity 1000L модификацияси қўлланган) жамланмасида 5G-модем ҳам мавжуд. Смартфон тақдимот тадбирида унинг қудратини кўрсатиш учун бешинчи авлод уяли алоқа тармоғида ўйин ўйнаб ҳамда Full HD форматида видеоқўнғироқ қилиб кўрсатишди.
ЎҚИНГ: Россияда аллақачон 5G тармоғида голографик қўнғироқ қилиб кўрсатишди! (+видео)
Oppo Reno 3 тезкор/доимий хотираси ҳажмига кўра икки хил модификацияда таклиф этилади ва нархлари ҳам шунга яраша. Унинг 8/128 гигабайтлик талқини учун 485 АҚШ долларига, 12/128 гигабайтлиги учун эса 530 долларга тенг нарх белгиланган.
Смартфоннинг олд камераси 32 мегапикселлик якка датчикдан иборат бўлиб, экраннинг томчисимон кемтигига жойланган. Шунингдек, дисплейга учинчи авлод оптик бармоқ изи сканери ҳам жорий этилган.
Oppo Reno 3 бош камераси тўрт модулли бўлиб, қўшалоқ оптик барқарорлаштириш тизимига эга. Унинг асосий сенсори эса 64 мегапикселлик аниқликда.
Смартфоннинг 4025 мА/соатлик аккумуляторига Oppo ишланмаси – VOOC 4.0 тезкор қувватлаш технологияси татбиқ этилган. Корпус қалинлиги 7,96 миллиметрга тенг, вазни эса 181 грамм тош босади.
