Galaxy S10+’нинг глобал версияси Geekbench тестида Samsung’ни шарманда қилди!

Жанубий кореялик техногигант Galaxy S10 туркумидаги флагманларининг тақдимот кунини расман эълон қилган. Шунингдек, улардан айримларини аллақачон бенчмаркларда текширишга ҳам улгуришган.

ЎҚИНГ: Galaxy S10+ ҳам Geekbench’да: яна бир карра уят, Samsung, уят!..

Ўтган ҳафтада Geekbench сервисида каталог рақами SM-G975U бўлган Galaxy S10+ флагмани текшириб кўрилган эди. Бу – етакчи флагманнинг АҚШ бозорига мўлжалланган, Snapdragon 855 процессорли варианти бўлиб, якка ядроли ва кўп ядроли синовларда тегишлича 3413 ҳамда 10256 балл олган. Айтиш керакки, бу – мазкур бенчмаркда Sony Xperia XZ4 тўплаган очколардан (мос равишда 3497 ва 12801 балл) анчагина пастдир.

Энди эса айни шу Samsung Galaxy S10+ флагманининг глобал бозорга мўлжалланган талқини ҳам Geekbench бенчмаркида текширилгани маълум бўлди. Буни қарангки, SM-G975N модел рақамли – Exynos 9820 процессори базасидаги ушбу смартфон яна паст балл олди!

Кўриб турганингиздек, глобал талқиндаги Samsung Galaxy S10+ ушбу имтиҳонда атиги 3248 ва 7999 балл тўплай олган, холос. Бу эса ўтган йилги флагманлар – iPhone XS ва ҳатто Galaxy S9 натижаларидан ҳам паст кўрсаткич!

Нима ҳам дердик, бенчмаркда ушбу смартфонларнинг синов намуналари текширилганлигидан, бозорга чиқариладиган якуний варианти яхшироқ натижа кўрсатишидан умид қилиш қолди, холос...

ЎҚИНГ: Samsung Galaxy S10 туркумидаги учта флагман битта расмий суратда!