Huawei бўш келмайди – бир неча ойдан сўнг у Samsung’ни тахтдан ағдармоқчи!
Шу кунларда – 11–12 июнь кунлари Шанхай шаҳрида CES Asia кўргазмасида бўлиб ўтмоқда. Унда қатнашган Huawei Consumer Business Group стратегик режалаштириш бўйича бош мутахассиси Шао Янг (Shao Yang) ғалати даъво билан чиқиш қилди...
ЎҚИНГ: Смартфон бозори: нафақат Huawei, балки яна бир хитойлик компания Apple’дан ўзиб кетди!
Унга кўра, шу йилнинг тўртинчи чорагидаёқ Huawei дунёдаги биринчи рақамли смартфонсоз бўлиши мумкин эди. Бироқ вазият ўзгаргани сабабли Samsung’ни тахтдан ағдариш энди сал кейинга сурилмоқда.
Аввалроқ хабар берганимиздек, хитойлик техногигант смартфонсозларнинг глобал рейтингида Apple’ни қувиб ўтиб, иккинчи ўринга чиқиб олган. Биринчи ўринни ҳануз Samsung қўлдан бермаяпти, аммо етакчилар орасида фақатгина Huawei кўрсаткичларида ўсиш мавжуд. Агар шу темпда кетганида, чиндан ҳам йилнинг охиригача у биринчи рақамли смартфонсоз бўлиши аниқ эди...
Лекин АҚШ ҳукуматининг санкциялари сабабли кўплаб компаниялар хитойлик техногигант билан ҳамкорликни тўхтатди. Huawei смартфонлари Android тизимидан, ўзининг Kirin процессорларидан, хотира чипларидан, Facebook компаниясига қарашли барча иловалардан маҳрум бўлаётир. Шунга қарамасдан, хитойлик гигант бу муаммоларни аввалдан пайқаган ва чораларини кўриб қўйган. Ҳатто у аллақачон ўзининг HongMeng тизими ўрнатилган миллионта смартфонини маҳаллий бозорда сотиб улгурган!
Шао Янг сўзларига қараганда, вазият шундай тус олган бўлса-да, Huawei асло таслим бўлмоқчи эмас, балки аксинча – олға интилаётир. Компания топ-менежерининг таъкидлашича, смартфонсозлик тахтини эгаллаш шунчаки бир неча ойга кечикади, холос.
ЎҚИНГ: Huawei смартфонларига ўрнатилувчи Hongmeng (ёки Ark OS) операцион тизимининг илк скриншотлари!
