Xiaomi’нинг энг муаммоли смартфони антирекорд ўрнатди!
«Хитойча Apple» ўзининг Xiaomi Mi CC9e смартфонини глобал версияда Xiaomi Mi A3 номи билан тақдим этган. Android One дастури доирасида «тоза» тизим билан чиқарилган бу қурилмага яқинда Android 10 операцион тизим талқинидаги прошивка тарқатилган эди.
ЎҚИНГ: Xiaomi’нинг ушбу смартфонига келган янгиланиш уни «ғишт»га айлантирди
Xiaomi энди мазкур апдейтни ҳам тўхтатиб туришга мажбур бўлди, чунки Android 10 талқинигача янгиланган ушбу русум смартфонларида бир қатор муаммолар кузатилди. Шу тариқа, Xiaomi Mi A3 моделига янгиланиш учинчи марта тарқатилиб-тўхтатилди ва бу билан у ҳақиқий антирекорд ўрнатди.
Xiaomi Mi A3 фойдаланувчилари янгиланишдан сўнг дуч келган муаммолар рўйхатида, жумладан, қуйидагилар мавжуд:
- Аккумулятор қуввати тез тугаб қолади;
- Смартфон тасодифан ўз-ўзидан ўчиб ёнади;
- Бармоқ изи сканери ишламай қолади;
- Камера иловаси «қотиб» қолади;
- Умумий самарадорлик пасайган;
- Фойдаланувчи интерфейсида хатоликлар бор.
Афтидан, компания Xiaomi Mi A3 учун прошивкани энди пухта ишлаб, кейин чиқарса керак. Эслатиб ўтамиз, интернетда Xiaomi ва Redmi смартфонларининг расмий прошивкалари «хазинаси» ҳам бор.
ЎҚИНГ: Биринчилар қаторида MIUI 12’га янгиланувчи Xiaomi ва Redmi смартфонлари рўйхати
