«Kasperskiy laboratoriyasi» yangi kiberhujumlar xavfidan ogohlantirdi
Kompaniyalar yangi kiberhujumlarga
hamda «raqamli» tovlamachilik holatlariga tayyor turishlari lozim. «Kasperskiy laboratoriyasi»ning
kritik infratuzilma xavfsizligi biznesini rivojlantirish bo‘yicha direktori Andrey
Suvorov ma’lum qildi, deb yozadi
Riafan.ru.
«Bu kabi holatlar hali endigina boshlanayotganini nazarda tutsak, oldingi
tovlamachi-viruslar hujumi o‘ziga xos sinov ekanini tushunamiz», – deya ma’lum qildi
mutaxassis.
Suvorovning ta’kidlashicha, kiberjinoyatchilar endi bank hisoblari va kredit
kartalaridan avvalgidek tez-tez ma’lumot o‘g‘irlamay qo‘yishgan. Zero, ularga IT-texnologiyalar
bilan bog‘liq korxonalarning faoliyatini kiberhujumlar orqali to‘xtatib qo‘yib, ularni
blokdan yechish evaziga haq talab qilish osonroq. Mutaxassis shu o‘rinda, Yevgeniy Kasperskiy
tarmoqda tovlamachiliklarni amalga oshirish holatlari ko‘payishi mumkinligidan ogohlantirganini
ham eslatib o‘tdi.
Xabaringiz borki, 2017 yili dunyoning ko‘plab mamlakatlarida xususiy korxonalar
va davlat tashkilotlarining kompyuter tarmoqlari WannaCry va Petya tovlamachi-viruslari
hujumlariga uchradi. Insoniyatga rekord miqdorda zarar keltirgan WannaCry virusi kompyuterni bloklab qo‘yib, blokni yechish uchun foydalanuvchidan to‘lov talab
qiladi. Ma’lumotlarga ko‘ra, jahon bo‘ylab bir necha o‘n ming kompyuter zararlangan,
ular orasida O‘zbekiston hududidagi qurilmalar ham bor. Keyinchalik
mazkur virusdan xakerlar qancha ishlagani ma’lum bo‘ldi, Microsoft
kompaniyasi esa uning aybdorini va himoyalanish chorasini aytdi, keyinroq
esa kiberhujumlar xavfi tufayli Windows XP va boshqa eski tizimlarini yangiladi hamda ularning himoyasidagi «tuynuk»larini yopdi. «Kasperskiy laboratoriyasi» bo‘lsa, WannaCry virusini
Shimoliy Koreya yaratgan, deya gumon qilyapti. Janubiy Koreyani esa mazkur virusdan Samsung himoya qilmoqchi.
27 iyun kuni boshlangan Petya.A virusi hujumi ham katta talafotlar olib kelgan, Ukraina bunda Rossiya maxsus xizmatlarining qo‘li bor, deya gumon qilmoqda. Symantec kompaniyasi esa mazkur virusdan himoyalanishning oddiy va samarali yo‘lini topganini ma’lum qildi.
