Xitoyning yetakchi internet qidiruv tizimi o‘z bankini ochadi

Xitoyning yetakchi internet qidiruv tizimiga egalik qiluvchi Baidu kompaniyasi mamlakat rahbariyatidan Pekinda o‘zining onlayn-bankini ochishga ruxsat oldi. Bu haqda Kun.uz xabar bermoqda.

Yangi bank Baixin Bank deb ataladi. Bankning yaratilishida Xitoyning China CITIC Bank banki ham ishtirok etmoqda. Bu xizmat qachon ishga tushirilishi ma’lum qilinmagan.

Yangi bank ko‘rsatadigan xizmatlar ichida jismoniy shaxslar va kichik biznesga kredit berish, investitsion mahsulotlarni sotish kabilar bo‘ladi. China CITIC Bank raisi Li Sinpinning aytishicha, yangi bank bozorda odamlarga aktivlarini boshqarishda yordam beruvchi tashkilot sifatida faoliyat yuritadi.

2015 yilda Xitoyning yana bir internet giganti Alibaba Group o‘zining mobil banki Mybank’ni ishga tushirgandi. Shu yili Xitoyning internet-provayderi Tencent ham Webank deb nomlangan shunday xizmatni yaratgandi.

Baidu Xitoyda eng ommaviy qidiruv tizimi hisoblanadi. U qayta ishlanuvchi so‘rovlar miqdori bo‘yicha Google’dan keyin dunyoda 2-o‘rinda turadi.