Xiaomi Mi Note 10 va uning Pro talqini namoyish qilindi!
Kutilganidek, bugun Xiaomi kompaniyasi Xiaomi CC9 Pro`ning xalqaro bozorga mo‘ljallangan talqinini namoyish etdi. Kecha Xiaomi CC9 Pro smartfonining taqdimoti bo‘lib o‘tgandi. Bugun esa uning global talqini – Mi Note 10 namoyish qilindi. Shuningdek, kompaniya yanada mukammallashtirilgan Mi Note 10 Pro modelini ham tanishtirib o‘tdi.
Umuman olganda, ikki yangi model bir-biridan unchalik farq qilmaydi. Ularning birida yettita plastik linza(7P) bo‘lsa, ikkinchisida esa shunday linzalar soni bu bittaga ko‘p(8P).
S5KHMX nomli F/1,69 diafragmali 108 MPlik asosiy, portret rejimi uchun 12 MPlik, 2 MPlik makro va 20 MRlik ultrakengburchakli datchiklar, shuningdek, 10 karra gibrid zumga ega 5 MPlik telefotomodul birlashib pentakamerani tashkil qilgan. Old kamera aniqligi 32 MP.
Smartfon 6,47 dyumli OLED ekranli chekkalari qayrilgan giperbolik displeyga ega bo‘lgan. Barmoq izi ham displey ostidan joy olgan.
Akkumulyator sig‘imi 5260 mA/soatni(!) tashkil qiladi, shuningdek 30 Vt quvvat bilan tezkor zaryadlanadi.
Smartfonlar asosi sifatida yakkakristalli Snapdragon 730G protsessori o‘rnatilgan. Qurilmalar shuningdek NFC, 3,5 mmlik audiotirqish va IK-port bilan jamlangan. Kamerafonga Android 9 Pie asnosida ishlangan MIUI 11 grafik qobig‘i o‘rnatilgan.
Xiaomi Mi Note 10 modeli 15 noyabr sanasidan boshlab Ispaniyada 6 GB tezkor va 128 GB doimiy xotirali talqini 549 yevrodan sotuvga chiqishi aytilgan. 8/128 GB xotirali Xiaomi Mi Note 10 Pro esa 649 dollardan sotilishi belgilangan.
O‘QING: Redmi Note 8T namoyish qilindi – uning oddiy Redmi Note 8’dan farqlari qanday?
